एमसीसी सदनमा ट‍ेबुल गर्न सत्ता गठबन्धन सहमत

काठमाडौं- अमेरिकी सहायता परियोजना एमसीसी संसद् बैठकमा टेबुल गर्ने निर्णय सत्ता गठबन्धनले गरेको छ। गठबन्धनका शीर्ष नेताहरुको आज बिहान बसेको बैठकले आजै दिउँसो बस्ने प्रतिनिधिसभा बैठकमा एमसीसी टेबुल गर्ने निर्णय गरेको हो। 

नेकपा (एस) का अध्यक्ष माधवकुमार नेपालले एमसीसी संसद्मा टेबल गर्ने सहमति सत्ता गठबन्धनमा जुटेको जानकारी दिए। एमसीसी प्रधानमन्त्री केपी ओलीकै पालामा संसद् सचिवालयमा दर्ता भइसकेको छ। त्यसलाई सदनमा पेस गर्ने सहमति जुटेको हो।

लामो वादविवादपछि सत्ता गठबन्धनका दलहरू एमसीसी प्रतिनिधिसभामा टेबुल गर्न तयार भएका हुन्।

नेकपा एकीकृत समाजवादीले हिजै एमसीसी टेबल हुन दिनुपर्ने निर्णय गरेको थियो। यद्यपि, पार्टीभित्र यसबारे एकमत भने छैन।

यथास्थितिमा एमसीसी अगाडि बढाउनै नहुने अडानमा रहेको नेकपा माओवादी पनि लचिलो बनेपछि गठबन्धनमा सहमति जुटेको हो। पाँच दलीय गठबन्धनमध्ये चित्रबहादुर केसी नेतृत्वको राष्ट्रिय जनमोर्चा भने एमसीसीको विपक्षर्म छ।

आज दिउँसो १ बजे प्रतिनिधिसभाको बैठक बोलाइएको छ। त्यसअघि सभामुख अग्निप्रसाद सापकोटाले ११ बजे कार्यव्यवस्था तथा परामर्श समितिको बैठक बोलाएका छन्। उक्त बैठकले प्रतिनिधिसभा बैठकको कार्यसूची तय गर्ने बताइएको छ। 

गठबन्धनको बैठक भने बिहान १० बजे प्रधानमन्त्री निवास बालुवाटारमा बसेको थियो।

त्यसअघि गठबन्धनमा रहेका तीन दलले छुट्टै छलफल गरेका थिए। नेकपा (एस) का अध्यक्ष माधवकुमार नेपालको निवास कोटेश्वरमा तीन दलको बैठक बसेको हो। नेपाल निवासमा नेकपा माओवादी केन्द्र, नेकपा (एस) र जनता समाजवादी पार्टीका नेताहरुले छलफल गरेपछि बालुवाटार बैठक बसेको हो।