नक्कली सुनको गहना बिक्री गर्ने व्यक्ति पक्राउ

काठमाडौं- नक्कली सुनको गहना बेच्‍ने कार्यमा संलग्‍न रहेको अभियोगमा सिरहा कल्याणपुर घर बताउने ३२ वर्षीय पंकज कुमार गुप्तालाई बुधबार प्रहरीले पक्राउ गरेको छ।

काठमाडौं बुढानीलकण्ठ नगरपालिका-८ मानबहादुर मार्ग नजिकै रहेको असिम सुनचाँदी पसलमा सुनजस्तै देखिने नक्कली सुन बेच्‍न लागेको भन्‍ने सूचना प्राप्त हुनासाथ महानगरीय प्रहरी प्रभाग बुढानीलकण्ठबाट खटिएको प्रहरीले गुप्तालाई सुन जस्तो देखिने पहेलो धातुको सिक्री २ थानसहित पक्राउ गरेको हो।

गुप्ताले काठमाडौं महाराजगञ्जस्थित जयलक्ष्मी सुनचाँदी पसल र ललितपुर सातदोबाटोस्थित ओमलक्ष्मी सुनचाँदी पसलमा अन्दाजी १-१ तोलाको सुन जस्तो देखिने पहेंलो धातुको सिक्रीहरू बिक्री गरिसकेको अनुसन्धानको क्रममा खुलेको जनाइएको छ।

उनीउपर ठगी आपराधिक विश्वासघात तथा आपराधिक लाभसम्बन्धी कसूरमा पाँच दिन म्याद अनुमति लिई महानगरीय प्रहरी वृत्त महाराजगञ्‍जबाट थप अनुसन्धान भइरहेको छ।