डा. यादवलाई बीपीको उपकुलपतिको हैसियत कानुनसम्मत : मन्त्री खतिवडा

विराटनगर- स्वास्थ्य तथा जनसंख्यामन्त्री विरोध खतिवडाले सुनसरी धरानको बीपी कोइराला स्वास्थ्य विज्ञान प्रतिष्ठानको उपकुलपतिको हैसियतमा डा. श्यामसुन्दर यादवलाई दिएको जिम्मेवारी कानुनसम्मत नै भएको दाबी गरेका छन्। 

उनले भने,‘कानुन विपरीत भएको हो-होइन त्यो बोल्ने संस्था छुट्टै छ। त्यो जिम्मेवारी उसलाई दिऊँ।’ डा. यादव जिम्मेवारी सम्हाल्न आइसकेको उनले बताए। मन्त्री खतिवडाले भने,‘उहाँ एक-दुई कामका लागि जानु भएको थियो, सायद फर्किसक्नुभयो होला।’ मन्त्रीस्तरीय निर्णय गर्दै प्रमुख विशेषज्ञ डा. यादवलाई उपकुलपतिको हैसियतमा अस्पताल सञ्चालन तथा प्रतिष्ठानको दैनिक प्रशासनिक कार्य गर्ने जिम्मेवारी दिएको उनको भनाई छ। 

मन्त्री खतिवडाले कोभिड १९ विरुद्धको खोपको विवरण चाँडै सार्वजनिक गरिने बताएका छन्। उनले एउटा पनि खोप नहराएको पनि दाबी गरे। विराटनगर विमानस्थलमा शनिबार सञ्चारकर्मीसँग कुराकानी गर्दै सरकारले हराएको खोप खोजीका लागि गठित समितिले विवरण संकलन गरिरहेकाले चाँडै विवरण सार्वजनिक गरिने बताए। 

उनले भने,‘एउटा पनि खोप हराएको छैन। केही खेर गयो होला। तर, हराएको छैन।’ मन्त्रालयले प्रदेश र प्रदेशले स्थानीय तहमा पठाएको खोपको विवरण संकलन भईरहेको उनले बताए। 

स्वास्थ्यमन्त्री खतिवडाले नोवेल मेडिकल कलेज विराटनगर र केएमसीमा भइरहेको विद्यार्थी आन्दोलनलाई सरकारल सम्बोधन गर्ने बताए। उनले कानुन विपरीत जाने छुट कसैलाई नभएकाले आवस्यक कारबाही गर्न प्रमुख जिल्ला अधिकारीलाई निर्देशन दिइसकिएको बताए।