प्रदेश १ का नवनियुक्त मन्त्रीहरूले शपथ लिए

विराटनगर– प्रदेश नम्बर १ का नवनियुक्त मन्त्रीहरुले पद तथा गोपनीयताको शपथ लिएका छन्। मुख्यमन्त्री राजेन्द्र राईको सिफारिसमा आज आइतबार प्रदेश प्रमुख परशुराम खापुङले मन्त्रीहरुलाई नियुक्त गरेसँगै आज नै शपथ ग्रहण भएको हो। 

नवगठित मन्त्रिपरिषद्मा मुख्यमन्त्री र एक राज्यमन्त्रीसहित १२ जना मन्त्री छन्।

मुख्यमन्त्री कार्यालयका अनुसार रामकुमार राई, राजन राई, खिनु लिम्बु, झलकबहादुर मगर, शेखरचन्द्र थापा, ओम प्रकाश सरावागी, प्रतापप्रकाश हाङगाम, उपेन्द्रप्रसाद घिमिरे मन्त्री नियुक्त भएका छन्। यस्तै विष्णु तुम्बाहम्फे राज्यमन्त्री बनेका छन्।

गत कात्तिक १६ मा गठित मन्त्रिपरिषद्‍ आइतबार विस्तार गरिएको हो। केही दिनअघि बसेको मन्त्रिपरिषद् बैठकले मन्त्रालय फुटाउने निर्णय गरेर क्याबिनेट जम्बो बनाउने निर्णय गरेको थियो। इन्द्रबहादुर आङ्बो आर्थिक मामिला, हिमाल कार्की सडक पूर्वाधार तथा सहरी, केदार कार्की आन्तरिक मामिला, जयराम यादव स्वास्थ्यमन्त्री यसअघि नै बनेका थिए।

आइतबार थपिएका रामकुमार राई खानेपानी तथा सिँचाइ तथा ऊर्जा, राजन राई सामाजिक विकास, खिनु लिम्बु पर्यटन तथा संस्कृति, झलकबहादुर मगर कृषि, शेखरचन्द्र थापा वन, वातावरण तथा भू–संरक्षण, ओमप्रकाश सरवागी उद्योग, श्रम तथा रोजगार, प्रताप हाङगाम भूमि व्यवस्था र उपेन्द्रप्रसाद घिमिरे यातायात व्यवस्था तथा सञ्चार मन्त्री बनेका छन्। राज्यमन्त्री बनेका विष्णु तुम्वाहाम्फेले सामाजिक विकास मन्त्रालयको जिम्मेवारी पाएका छन्।