बुर्किना फासोलाई हराउँदै सेनेगल अफ्रिका कपको फाइनलमा

काठमाडौं- बुधबार राति सम्पन्न खेलमा जित निकाल्दै सेनेगल अफ्रिका कप अफ नेसन्सको फाइनलमा प्रवेश गरेको छ। क्यामरुनमा जारी प्रतियोगिताको पहिलो सेमिफाइनल खेलमा बुर्किना फासोलाई ३-१ गोलअन्तरले हराउँदै सेनेगलले फाइनलमा स्थान बनाएको हो।

सेनेगलको जितका लागि अब्डोयु डियल्लो, इड्रिसा गुएउ र साडियो मानेले समान १-१ गोल गरे। यता बुर्किना फासोका ब्लाटी टोरले एक गोल फर्काए। 

खेलको ७०औं मिनेटमा डियल्लोले सेनेगललाई अग्रता दिलाएका थिए। त्यस्तै, ७६ औं मिनेटमा गुएउले अग्रता दोब्बर बनाएका थिए।

यता ८०औं मिनेटमा टोरले एक गोल फर्काएपछि खेल २-१ को अवस्थामा पुगेको थियो। तर निर्धारित समयको तीन मिनेटअघि मात्र मानेले गोल गर्दै सेनेगलको ३-१ को जित निश्चित गरे।

अब दोस्रो सेमिफाइनल खेल बिहीबार राति हुँदैछ। यो खेलमा इजिप्टले आयोजक क्यामरुनको सामना गर्नेछ। यो खेलको विजेताले आगामी आईतबार राति हुने फाइनल खेलमा सेनेगेलको सामना गर्नेछ।