नेपालसँग फन्‍नी खेल भयो : मोरिसस प्रशिक्षक टोनी

काठमाडौं- मंगलबार सम्पन्न नेपालसँगको खेललाई लिएर मोरिससका प्रशिक्षक टोनी फ्रान्कोइसले खेल फन्नि भएको बताएका छन्। उनले दुई खेलबारे बोल्दै खेल चाखलाग्दो भएको बताएका हुन्।

१–० को हारपछि उनले आफूले राम्रो खेलेको पनि बताएका छन्। उनले भने, ‘हामीले राम्रो खेल्यौँ। हामीले केहि अवसर पायौँ। गोलको लागि काम गरेको पनि हो तर सकिएन।’ नेपाल भ्रमणका दौरान मोरिससले गोल गर्न सकेन।

आजको खेलमा मोरिससका दुई खेलाडीले रातो कार्ड पनि पाएका थिए। रेफ्रिबारे के भन्नुहुन्छ ? भन्ने प्रश्नमा उनले केही नभन्‍ने बताएका छन्। उनले भने, ‘रेफ्री को निर्णयबारे केही भन्दिनँ। त्यहाँ कोही थिए रातो कार्ड खान लायक खेलाडी। हामी यो खेलको पछि अनुसन्धान गर्छौं र विश्‍लेषण गर्छौं।’

उनले दुबै खेल हारे पनि दुई खेलमा हार बेहोरे पनि आत्मविश्वास बढेको बताएका छन्। उनले भने, ‘पहिलो खेलमा डर थियो। आज आत्मविश्वास राम्रो थियो। तर आज पनि जित निकाल्न सकेनौँ।’

रंगशालाको पीचमा केही समस्या देखिए पनि उनले पीचबारे पनि कमेन्ट गर्न चाहेनन्। ‘पीच दुवै टिमका लागि थियो। हामीले धेरै मैत्रीपूर्ण देख्यौँ। तर म आफ्नो टिमको पूरा रेस्पोन्सेबिलिटी लिन्छु। तर यो फन्‍नी खेल भयो। दुवै टिम जितको लागि तिर्खाएका थिए,’ उनले भने।