आईपीएल अक्सनमा नेपालबाट सन्दीप मात्र छानिए

काठमाडौं- नेपाली क्रिकेटर सन्दीप लामिछानेलाई इन्डियन प्रिमियर लिग(आईपीएल)ले आगामी अक्सनका लागि छनोट गरेको छ।

आईपीएलले सार्वजनिक गरेको सूचीमा नेपालबाट सन्दीपको मात्र नाम अटाएको छ। सन्दीप पछिल्लो अक्सनमा पनि सहभागी बनेका थिए। तर सो अक्सनमा उनलाई कुनै टिमले अनुबन्ध गरेको थिएन। त्यसअघि उनले तीन सिजन आईपीएल खेलिसकेका छन्। 

यो पटक आईपीएलमा सहभागी बन्ने टिमको संख्या पनि १० पुगेको छ। यस्तोमा थप नेपाली खेलाडीले अवसर पाउने आकलन गरिएको थियो। तर अक्सनका लागि सन्दीपले मात्र अवसर पाउने भएका छन्।

नेपालबाट नाम दर्ता गराएका खेलाडीमा सन्दीप लामिछाने, कुशल भुर्तेल, आशिफ शेख, रोहित पौडेल, विनोद भण्डारी, करण केसी, सोमपाल कामी, पवन सर्राफ, सन्दीप जोरा, सुशन भारी, अभिनास बोहरा, शरद भेषावकर, कुशल मल्ल, करण केसी र दिपेन्द्र सिंह ऐरी थिए।

अक्सनबाट कुनै पनि टिमले लामिछानेलाई भित्र्याउन चाहेमा न्यूनतम ४० लाख भारतीय रुपैयाँ तिर्नुपर्ने हुन्छ।