जनकपुरधाम– सर्लाहीको हरिओन नगरपालिकाका प्रमुख र उपप्रमुख चढेको गाडीमा तोडफोड भएको छ।
राष्ट्रियसभा निर्वाचनका लागि जनकपुरधाम आएका नगरपालिकाका प्रमुख गणेश प्रसाई र उपप्रमुख रेणुका पौडेल सवार सरकारी नम्बर प्लेटको गाडीमा तोडफोड भएको हो।
जनकपुरधामको राम चोकमा प्रमुख र उपप्रमुख मतदान गर्न जाँदै गरेको समयमा प्रदेश २–०३–००१ झ ००२० नम्बरको गाडीमा तोडफोड भएको हो। सो क्रममा प्रमुख प्रसाईलाई टाउकोमा सामान्य चोट लागेको छ।
राष्ट्रियसभाको मधेस प्रदेशमा २ पदका लागि आज मतदान हुँदैछ। सोही मतदानमा जनमत पार्टीका कार्यकर्ताहरुले किसान आन्दोलनको नाउँमा तोडफोड तथा प्रदर्शन गरिरहेका छन्। प्रहरीले जनमतका केही कार्यकर्ताहरुलाई नियन्त्रणमा समेत लिएको छ भने दर्जनौं राउण्ड अश्रुग्यास प्रहार गरेका छन्।