राष्ट्रियसभा निर्वाचन : सुदूरपश्चिममा कांग्रेस सबैभन्दा बलियो

धनगढी- आज हुने भनिएको राष्ट्रियसभाको निर्वाचनको तयारी सुदूरपश्चिममा पूरा भएको छ। प्रदेश निर्वाचन कार्यालयका अनुसार आज बिहान ९ बजेदेखि मतदान सुरु हुने छ। 

कार्यालय प्रमुख प्रेमदत्त भट्टले बिहान ९ बजेदेखि सुरु हुने मतदान दिउसो ३ बजे सकिने बताएका छन्। ‘निर्वाचनको सम्पूर्ण तयारी पूरा भएको छ,’ कार्यालय प्रमुख प्रेमदत्त भट्टले भने, ‘मतदानका लागि प्रदेश सभाभित्र दुई वटा मतदान केन्द्र बनाइएको छ। स्थानीय तहका प्रमुख र उपप्रमुखका लागि एउटा र प्रदेशसभा सदस्यका लागि एउटा मतदान केन्द्र बनाएका छौं।’

 सुदूरपश्चिममा तीन जना राष्ट्रियसभा सदस्य चुन्न नेकपा एमाले र अन्य तीन दल गठबन्धन बनाएर निर्वाचनमा होमिएका छन्। नेकपा एमालेबाट महिलातर्फ कैलालीकी सन्तोषकुमारी शर्मा थापा, दलिततर्फ बैतडीका नरेश विक र खुलातर्फ डोटीका डिल्लीराज भट्टले मनोनयन दर्ता गरेका छन्। 

यता, गठबन्धनबाट नेपाली कांग्रेसको तर्फबाट नारायणदत्त मिश्र, दलितमा माओवादी केन्द्रका जगत पार्की र महिलातर्फ एकीकृत समाजवादीका तर्फबाट गरिमा शाहले मनोनयन दर्ता गरेका छन्। 

सुदूरपश्चिममा प्रदेशसभा सदस्य र स्थानीय तहका प्रमुख तथा उपप्रमुखले मतदान गर्नेछन्। प्रदेशमा ५२ जना प्रदेशसभा सदस्य र १७५ जना स्थानीय तहका प्रमुख र उपप्रमुखले मतदान गर्नेछन् । 

५२ जना प्रदेशसभा सदस्यमध्ये एकीकृत समाजवादीका १४, माओवादी केन्द्रका १३, नेपाली कांग्रेसका १२, नेकपा एमालेका ११, राष्ट्रिय जनता पार्टी (राजपा) र लोकतान्त्रिक समाजवादी पार्टी (लोसपा) का एक/एक जना प्रदेशसभा सदस्य छन्।

प्रदेशमा मतभार यस्तो छ

सुदूरपश्चिम प्रदेशसभामा एकीकृत समाजवादीको ६७२, माओवादी केन्द्रको ६२४, नेपाली कांग्रेसको ५७६ र एमालेको ५२८ तथा राजपा र लोसपाको ४८/४८ मतभार रहेको छ। स्थानीय तहमा भने नेपाली कांग्रेस पहिलो स्थानमा छ। स्थानीय तहमा १७५ मतदातामध्ये कांग्रेसका ७४, एमालेका ७१, माओवादीका १७ र एकीकृत समाजवादीका १३ जना छन्।

कांग्रेसको मतभार एक हजार ३३२, एमालेको एक हजार २७८, माओवादीको ३०६ र एकीकृत समाजवादीको मतभार २३४ छ। स्थानीय तह र प्रदेशसभाको मतभार हेर्दा कांग्रेस सबैभन्दा बलियो देखिएको छ। 

कांग्रेसको सुदूरपश्चिम प्रदेशसभा र स्थानीय तहको मतभार जोड्दा एक हजार ९०८ छ। एमालेको एक हजार ८०४ छ भने माओवादी केन्द्रको ९२७ र एकीकृत समाजवादीको ९०६ मतभार रहेको छ।