आहा रारा गोल्डकप : टाइब्रकेरमा पुलिसको जित

काठमाडौं – पोखरामा जारी आहा रारा गोल्डपको दोस्रो खेलमा विभागीय टिम नेपाल पुलिस क्लबले हिमालयन शेर्पामाथि जित निकालेको छ। पोखरा रंगशालामा भर्खरै सम्पन्न खेलमा पुलिसले टाइब्रेकरमा ६–५ गोलअन्तरको जित निकालेको हो। खेलको पहिलो हाफ गोलरहित बराबरी भएपछि दोस्रो हाफमा दुई गोल भएका थिए।

दोस्रो हाफका पुलिसका निर कुमार राईले गोल गर्दै खेलमा विभागीय क्लबलाई अग्रता दिलाएका थिए। खेलको ५२ औं मिनेटमा राईले वान एन्ड वानको अवस्थामा गोल गर्दै पुलिसलाई अग्रता दिलाएका थिए। तर हिमालनयस शेर्पाले सात मिनेटमै बराबरी गोल फर्काइहाल्यो।

खेलमा हिमालयन शेर्पाका कप्तान विश्वास श्रेष्ठले गोल गरेर खेललाई बराबरीमा ल्याएका थिए। खेलको ५९ औं मिनेटमा डिबस्कको भित्रबाट गरेको प्रहार दोस्रो बार नजिकैबाट पोस्टको जालिसम्म पुगेको थियो। खेलको निर्धारित ९० मिनेटसम्म दुवै टिमबाट समान १–१ गोल भएपछि खेल अतिरिक्त समयमा पुगेको थियो।

अतिरिक्त समयमा पनि दुवै टिमबाट गोल हुन नसकेपछि टाइब्रेकरबाट निर्णय लिइएको हो। यो जितसँगै पुलिस प्रतियोगिताको क्वार्टरफाइनलमा पुगेको छ। पहिलो दिनको खेलमा जित निकाल्दै एपीएफ पनि क्वार्टरफाइनलमा पुगेको छ।