लुम्बिनीमा माघे संक्रान्तिको अवसरमा २ दिन सार्वजनिक बिदा

बुटवल- माघेसंक्रान्तिको अवसरमा लुम्बिनी प्रदेश सरकारले दुई दिन सार्वजनिक बिदा दिने निर्णय गरेको छ। माघे संक्रान्तिको अवसरमा लुम्बिनी प्रदेश सरकारले शनिबार र आईतबार दुई दिन सार्वजनिक बिदा दिने यसअघिको निर्णयलाई निरन्तरता दिएको मुख्यमन्त्री तथा मन्त्रिपरिषद् कार्यालयले जनाएको छ।

प्रदेश सरकार गठन भएको पहिलो वर्षदेखि थारु र मगर समुदायको महान् पर्व माघे संक्रान्ति र माघीको उपलक्ष्यमा माघ १ र २ गते प्रदेशभर सार्वजनिक विदा दिइँदै आएको थियो। 

लुम्बिनी प्रदेश बहुसाँस्कृतिक बहुजाती र बहुभाषीहरु रहेकाले त्यसैको सम्मान स्वरुप विदा दिइएको मुख्यमन्त्री केसीले एक विज्ञप्ति जारी गरि जानकारी दिएका छन्। उनले प्रदेशको विविधतालाई प्रदेश सरकारले सम्पत्तीका रुपमा ग्रहण गरेको बताउँदै माघे संक्रान्ति र माघी पर्वको अवसरमा शुभकामना दिएका छन्।  

विगतका दिनमा प्रदेश सरकारको तर्फबाट पुस महिनाको अन्तिम दिन साँस्कृतिक झाँकीसहित माघे संक्रान्ति एवं माघी मिलन कार्यक्रम आयोजना गर्दै आएको थियो। यो वर्ष कोभिड–१९ को तेस्रो लहरका कारणले कार्यक्रम स्थगित गरेको प्रदेश सरकारले जनाएको छ।