कांग्रेसको राजनीति गर्न उपप्राध्यापक लामाले राजीनामा दिए

काठमाडौं– कांग्रेस सिन्धुपाल्चोकको जिल्ला सभापति पदमा चुनाव लड्नका लागि त्रिभुवन विश्वविद्यालयका उपप्राध्यापक डा. प्रेमध्वज लामाले राजीनामा दिएका छन्। उनले पदबाट राजीनामा दिएको त्रिवि नेपाली इतिहास संस्कृति तथा पुरातत्व विभागले जनाएको छ।

नेपाली कांग्रेसको १४औं महाधिवेशनमा सिन्धुपाल्चोकबाट प्रतिनिधि निर्वाचित भएलगत्तै उनले उपप्राध्यापकबाट राजीनामा दिएका थिए। तर, उनको राजीनामा स्वीकृत भएको थिएन। नेपाली इतिहास, संस्कृति तथा पुरातत्व केन्द्रीय विभागमा कार्यरत लामाले राजीनामा बुझाएका मुख्य कार्यालय सहायक ईन्द्रकुमारी महर्जनले बताइन्।

हालै मात्र उनले विद्यावारिधि उपाधि हासिल गरेका हुन्। उनले यही २७ पुसमा हुने कांग्रेस सिन्धुपाल्चोकको सभापतिका उम्मेदवारी दिने भएका छन्। लामा पार्टी सभापति शेरबहादुर देउवा निकट नेता हुन्। विद्यार्थी राजनीतिबाट शिक्षण पेसामा प्रवेश गरेका लामा फेरि पार्टी राजनीतिमा लागेका छन्।