बागमतीका मुख्यमन्त्रीले ओलीलाई दिए ध्वंशकारी र कलंकको संज्ञा

काठमाडौं- बागमतीका मुख्यमन्त्रीसमेत रहेका नेकपा (एकीकृत समाजवादी)का उपाध्यक्ष राजेन्द्र पाण्डेले एमाले अध्यक्ष केपी शर्मा ओलीलाई ध्वंशकारी र कम्युनिस्ट आन्दोलनका कलंकको संज्ञा दिएका छन्। नेपाल कम्युनिस्ट पार्टी (एकिकृत समाजवादी) र नेपाल कम्युनिस्ट पार्टी (जनवादी) एकता घोषणा कार्यक्रमलाई सम्बोधन गर्दै उपाध्यक्ष पाण्डेले यस्तो संज्ञा दिएका हुन्। 

नेपालमा कम्युनिस्ट आन्दोलन समाप्त पार्न उद्यत भएको भन्दै पाण्डेले ओलीमाथि त्यस्तो आरोप लगाएका हुन्। '२७५ मध्ये १७४ सिट ल्याउन सक्ने पार्टी उहाँहरू (माधवकुमार नेपाल र झलनाथ खनाललगायत)ले बनाउनु भएको थियो। तर एक जना ध्वंशकारी भनौँ न, एक जना कलंकले २०७७ पुस ५ गते कम्युनिस्ट आन्दोलनलाई सिध्याउने अठोट गरे,' ओलीतर्फ संकेत गर्दै पाण्डेले भनेका थिए। 

ओलीले गत वर्ष पुस ५ गते संसद् विघटन गरेका थिए। त्यसपछि तत्कालीन नेकपा फुट्दै अहिले तीन पार्टी बनेको छ। 

ओलीले कम्युनिस्ट आन्दोलन सिध्याउने कोसिस गरेको भएपनि फेरि कम्युनिस्ट आन्दोलन पुनर्गठन गर्नका लागि आफूहरू लागिपरेको उनले बताए। 

'यही अभियानमा जनवादीका कमरेडहरू यो पार्टिमा समाहित हुनुभएको छ,' पार्टीमा प्रवेश भएका तत्कालीन जनवादीका नेताहरूलाई उनले भने।