काठमाडौं- बंगलादेशमा जारी एसियन सिनियर सेन्ट्रल जोन पुरुष तथा महिला भलिबल च्यालेन्ज कपअन्तर्गत महिलातर्फको उपाधिका लागि नेपालले मंगलबार उज्वेकिस्तानको सामना गर्दैछ।
नेपाल र उज्वेकिस्तानबीचको उपाधि भिडन्त ढाकाको मिरपुरस्थित सहिद शुरवार्दी इन्डोर स्टेडियममा बिहान सवा ११ बजे सुरु हुनेछ। साबिक विजेता नेपाल आज उज्वेकिस्तानलाई हराएर अपराजित रहँदै उपाधि रक्षा गर्ने दाउमा छ। नेपाल शीर्ष तथा उज्वेकिस्तान दोस्रो स्थानमा रहेर फाइनल पुगेका हुन्।
उज्वेकिस्तान पनि नेपालसँग लिग चरणमा बेहोरेको हारको बदला लिँदै उपाधि जित्न चाहन्छ। लिग चरणमा नेपालले उज्वेकिस्तानलाई ३-० को सोझो सेटमा हराएको थियो। महिलातर्फको तेस्रो स्थानका लागि मंगबार नै श्रीलंका र किर्गिस्तान प्रतिस्पर्धा गर्दैछन्।
पुरुषतर्फ नेपालले तेस्रो स्थानका लागि उज्वेकिस्तानसँग खेल्नेछ। लिग चरणमा उज्वेकिस्तानलाई ३-१ को सेटमा हराएको नेपाल त्यसलाई कायम राख्दै तेस्रो स्थान हासिल गर्ने प्रयासमा हुनेछ।