एसएसपी यादव मृत्यु प्रकरण : न्यूनतम सूचना पनि दिँदैन प्रहरी

बुटवल- संघीय प्रहरी एकाइ लुम्बिनी (पुरानो लुम्बिनी अञ्‍चल प्रहरी) का वरिष्ठ प्रहरी उपरीक्षक (एसएसपी) सुशीलकुमार यादव भैरहवास्थित सरकारी निवासभित्र मृत भेटिएपछि प्रहरी संगठनमा तरंग पैदा गराइदिएको छ। नागरिकको सुरक्षाका लागि खटिने प्रहरीका उच्च अधिकारी आफैं क्‍वार्टरमा मृत भेटिनुलाई प्रहरी संगठनको कमजोरीका रुपमा समेत चर्चा गर्न थालिएको छ।

यादवको शव झुन्डिएको अवस्थामा फेला परेको रुपन्देही प्रहरी प्रमुख प्रहरी उपरीक्षक मनोज केसीले बताए। मिजासिलो स्वभावका यादवले 'आत्महत्या’ गरेको भनेर उनीसँगै काम गर्नेहरुले विश्वास गरेका छैनन्। 

'क्वार्टरभित्र शव भेटिएको छ, भित्र हामी पसेका छैनौं, उहाँ (यादव) को परिवारका सदस्य आएपछि क्वार्टरमा जान्छौं,’ केसीले भने। यादव कुन अवस्थामा मृत भेटिए भन्‍नेबारे प्रहरी कार्यालयले कुनै जानकारी दिएको छैन।

शुक्रबार बिहान १० देखि १२ बजेको बीचमा घटना भएको प्रहरी प्रमुख केसीले बताए। स्रोतका अनुसार यादवलाई खाना खान बोलाउन जाँदा ढोका नखुलेपछि झ्यालबाट हेर्दा झुन्डिएको देखेपछि घटना बाहिरिएको हो। जिल्ला प्रहरी कार्यालय रुपन्देहीमा मध्याह्न १२ बजे सूचना आएको प्रहरी प्रमुख केसीले बताए।

कारण के होला ?  

आमनागरिकको सुरक्षा गर्ने उच्चतहको प्रहरी अधिकृतले 'आत्महत्या’ गर्नुको कारणबारे कुनै तथ्य फेला परेको छैन। तर, यादवले बेलाबेलामा बढुवा नभएको भन्दै चिन्ता प्रकट गर्दै आएका थिए। उनी निकटहरुका अनुसार पछिल्लो बढुवाको सूचीमा छुटाइएपछि निराश थिए। प्रहरी प्रधान कार्यालयको एक वर्षअघिको बढुवा सूचीबाट उनको नाम छुटाइएको थियो।

यादव एआईजी विश्वराज पोखरेल र सहकुल थापालगायतको ब्याचमेट हुन्। यादवको अवकाशको मिति नजिकिएको थियो। 'उहाँ पछिल्लो समय दु:खी देखिनु हुन्थ्यो। तर, यादवको व्यवहार भने निकै फरासिलो देखिन्थ्यो। बढुवाकै कारणले मात्रै मृत्युको बाटो रोजेजस्तो त लाग्दैन,’ उनीसँगै विगतमा काम गरेका एक प्रहरी अधिृकतले भने,'अन्य कारण पनि हुनसक्छ, घटना शंकास्पद छ।’

नवलपरासी रामग्राम २ निवासी यादव पूर्व प्रहरी महानिरीक्षक ध्रुवबहादुर प्रधानका भाञ्‍जा हुन्। सर्वोच्च अदालतकी न्यायाधीश सपना प्रधान मल्ल यादवकी सानिमा हुन्। २०४९ सालमा सेवा प्रवेश गरेका उनी ५५ वर्षे उमेर हदका कारण आगामी २०७९ साल माघ १५ गते अवकाश हुने तयारीमा थिए।

प्रहरीले न्यूनतम सूचना पनि दिएन

संघीय प्रहरी एकाइको प्रमुख क्‍वार्टरमा बिहानको समयमा झुन्डिएको अवस्थामा शव भेटिएको खबर बाहिरिएको हो। तर, प्रहरीले आत्महत्या भनेर सूचना दिएको भए पनि कुन अवस्थामा शव भेटियो भन्‍ने जानकारी दिन सकेको छैन। संघीय प्रहरी एकाइ कार्यालयमा पत्रकारलाई प्रवेशमा रोक लगाएको छ।

यादवका मामा प्रधान क्वार्टरमा प्रवेश गरेर बाहिरिए। तर, उनले पनि कुनै प्रतिक्रिया दिएका छैनन्। लुम्बिनी प्रदेश प्रहरी प्रमुख प्रहरी नायब महानिरीक्षक प्रकाश अधिकारीले आफू घटनास्थलतर्फ अझै नपुगेको बताए। 'मृत भेटिएको खबर आएपछि म दाङबाट भैरहवातर्फ आउँदैछु,’ उनले भने।

सामान्य घटनाबारे जानकारी दिन पत्रकार सम्मेलन गर्ने प्रहरीले एक उच्चस्तरीय प्रहरी अधिकृत मृत अवस्थामा भेटिँदा जानकारी गराएको छैन। रुपन्देही प्रहरीले काठमाडौंबाट मृतक यादवका श्रीमती आएपछि क्वार्टरभित्र प्रवेश गर्ने र थप अनुसन्धान अघि बढाउने बताएको छ।