सिरहामा अवरुद्ध सडक चार घण्टापछि खुल्यो

जनकपुरधाम– सिरहामा छुरा हानाहानको क्रममा एक युवकको मृत्युपछि विरोधमा अवरुद्ध गरिएको पूर्वपश्चिम राजमार्ग ४ घण्टपछि खुलेको छ।

दोषीलाई पक्राउ गरी २४ घण्टाभित्र कारबाही प्रकृया अगाडि बढाउने, मृतकलाई क्षतिपूर्तिका लागि पहल गर्ने, घाइतेहरुको निःशुल्क उपचारको व्यवस्था गर्ने प्रहरी र स्थानीयबीच सहमतिपछि अवरुद्ध राजमार्ग खुलेको सिरहाका प्रहरी प्रवक्ता सुभाष बुढाथोकीले जानकारी दिए।

शनिबार साँझ दुई समूहबीच भएको छुरा हानाहानमा सिरहा गोलबजार नगरपालिका ६ डोहटिया टोलका २६ वर्षीय रामकुमार सदाको मृत्यु भएको थियो भने स्थानीय १९ वर्षका निकेश सदा गम्भीर घाइते भएका छन्। घाइते भएका निकेशको उपचार आरके मेडिसिटी अस्पतालमा भइरहेको छ।

दुई समूहबीचको झगडामा मृत्यु भएको हो। दोषीको पहिचान भइसकेको छ। उनीहरुलाई पक्राउ गरिसकेपछि मात्र परिचय खुलाउने प्रहरी नायब उपरीक्षक बुढाथोकीले बताए। घटनाको विरोधमा डोहटियाका स्थानीय बिहानैदेखि पूर्वपश्चिम राजमार्ग अवरुद्ध गरेर प्रदर्शनमा उत्रिएका थिए।