ए डिभिजन लिगमा थ्रीस्टार र एनआरटीको बराबरी

काठमाडौं– सहिद स्मारक ए डिभिजन लिगअन्तर्गत शनिबार साँझ सम्पन्न खेलमा थ्रीस्टार क्लब र न्युरोड टिमले गोलरहित बराबरी खेलेका छन्।

त्रिपुरेश्वरस्थित दशरथ रंगशालामा सम्पन्न खेलमा बराबरी गर्दै दुबै टिमले १–१ अंक बाँडेका हुन्। खेलमा दुबै टिमले अवसर बनाए पनि गोल गर्न सकेनन्।

खेलको २५ औं मिनेटमा थ्रीस्टारका बिजय भुजेलले गोलकिपर अजित प्रजापति अघि बढिसकेको अवस्थामा गोल गर्न चुके। उनको प्रहारमा बल पोस्टबाट बाहिरिएको थियो।

खेलको २९ औं मिनेटना अशोक खवासले प्रहार गरेको लङ रेन्ज प्रहार गोलकिपर प्रजापतिले क्रसबार नजिकैबाट मुश्किलले बचाए। खेलको ३७ मिनेटमा शेम मार्टनको प्रहार पनि पोस्टको नजिकैबाट बाहिरिएको थियो।

आक्रामक रुपमा सुरु भएको दोस्रो हाफमा एनआरटीले केही राम्रा अवसर सिर्जना गर्यो। औं मिनेटमा मेसुके ओलुमोउ, रन्जन गुरुङ र हेमन्त थापा मगरले गरेका प्रहार तिनै प्रहार थ्रीस्टारका खेलाडीले क्लियर गरिदिए।

अट्याकिङ थर्डमा एनआरटीको यो प्रयास असफल रह्यो। त्यस्तै ११ औं मिनेटमा मैदानको बायाँ कुनाबाट दर्शन गुरुङले गरेको क्रसलाई पेनाल्टी बकस भित्र रहेका मेसुके र सटेफेन बिनोङले भेट्न सकेनन्।

खेलको ६६ औं मिनेटमा बिकास खवासले दिएको लङ पासमा बिजयले हेडर प्रहारको प्रयास गरे पनि बल पोस्टको नजिकै बाट बाहिरियो। खेलको अन्तिम मिनेटमा संजोक राईको प्रहार गोलकिपर प्रजापतिले बचाएका थिए।