जनकपुरधाम– प्रदेश २ का मुख्यमन्त्री लालबाबु राउतले प्रदेशसभाको आठौं अधिवेशनले प्रदेशको नामकारण र स्थायी राजधानीको विषय निर्क्योल गर्ने बताएका छन्।
बुधबार आठौं अधिवेशनको पहिलो बैठकमा शुभकामना मन्तव्य दिँदै मुख्यमन्त्री राउतले यस अधिवेशनबाट प्रदेशले नाम र अस्थायी राजधानी पाउने विश्वास व्यक्त गरे। मुख्यमन्त्री राउतले प्रदेशले नाम र स्थायी राजधानी नपाउनुमा आफूहरुकै कमी कमजोरी रहेको स्वीकार गर्दै अबको प्राथमिकता नाम र राजधानी नै हुने बताए।
उनले यस विषयमा सत्तारुढ दलहरुका साथै प्रतिपक्षी दलहरुलाई बृहत छलफल गरेर निकास दिन आग्रह गरे। उनले भने, ‘सत्तारुढ दलभित्रै विभिन्न विचारधाराका दलहरु छौँ, प्रतिपक्षी दलहरु मिलेर नाम र राजधानीको सवालमा एक स्वर बनाउनु पर्छ।’ अब कार्यकालको अन्तिम वर्ष मात्रै रहेकाले यसका लागि बृहत छलफलको आवश्यक्ता रहेको मुख्यमन्त्री राउतको भनाइ थियो ।
यो अधिवेशनमा विभिन्न महत्वपूर्ण विधेयकहरु पास गराउनु पर्नेमा समेत राउतको जोड थियो।