पीएम कप महिला क्रिकेटको उद्घाटन खेलमा प्रदेश १ र कर्णाली भिड्ने

काठमाडौं– प्रधानमन्त्री कप राष्ट्रिय महिला क्रिकेट आगामी पुस ३ गतेदेखि धनगढीको फाप्ला क्रिकेट मैदानमा सुरु हुने भएको छ। नेपाल क्रिकेट संघ (क्यान)ले महिला पिएम कप पुसको ३ देखि ११ गतेसम्म आयोजना गर्ने जानकारी दिएको हो।

कोभिड महामारीले लामो समय स्थगित भएका प्रतियोगिता पछिल्लो वर्ष दाङको लमही क्रिकेट मैदानमा आयोजना भएको थियो। अहिले नयाँ संस्करणको प्रतियोगिता लमहीमा आयोजना हुन लागेको हो।

प्रतियोगितामा समूह ए मा चार र समूह बीमा चार गरी ८ समूह रहेका छन्। जहाँ हरेक प्रदेशको एक समूह छ भने त्यसबाहेक विभागीय टिम एपीएफ पनि छ।

समूह एमा प्रदेश १, लुम्बिनी, बागमती र कर्णाली प्रदेश रहेका छन्। त्यस्तै, समूह बीमा नेपाल एपीएफ क्लब, सुदूरपश्चिम, गण्डकी र प्रदेश २ रहेका छन्।

प्रतियोगिताको उद्घाटन खेलमा प्रदेश नम्बर १ ले कर्णाली प्रदेशको सामना गर्नेछ। त्यस्तै, पहिलो दिनको दोस्रो खेलमा बागमती प्रदेशले लुम्बिनी प्रदेशको सामना गर्नेछ। समूह चरणका खेल पुस ८ गते सकिनेछ। त्यस्तै, ९ गते ब्रेक रहेको छ। समूहमा शीर्ष दुई स्थानमा रहेका टिमले सेमिफाइनलमा खेल्न पाउनेछन्।

सेमिफाइनलमा जित निकाल्ने टिम उपाधिका लागि भिड्नेछन्। फाइनल खेल पुस ११ गते फाप्लामै हुनेछ।