स्वास्थ्य अनुसन्धान परिषद्‍को पहिलो प्रादेशिक कार्यालय सपहीमा

जनकपुरधाम– नेपाल स्वास्थ्य अनुसन्धान परिषद्ले प्रदेश २ मा इकाई कार्यालय स्थापना गरेको छ। धनुषाको लक्ष्मिनिया गाउँपालिकास्थित सपहीमा स्वास्थ्य अनुसन्धान परिषद्ले आफ्नो पहिलो प्रादेशिक कार्यालय स्थापना गरेको हो। 

प्रदेश स्वास्थ्य निर्देशनालयको भवनमै स्वास्थ्य परिषदको कार्यालय स्थापना गरिएको छ। प्रदेशका मुख्यमन्त्री लालबाबु राउतले आइतवार कार्यालयको उद्घाटन गरेका हुन्।

मुख्यमन्त्री राउतले परिषद्को इकाई कार्यालयको उद्घाटनपछि सम्बोधन गर्दै नेपाल अनुसन्धानमा सबैभन्दा पछाडि रहेको बताए। उनले कुनै पनि रोगको उपचारमा लाग्ने औषधिको राम्रोसँग व्यापक रुपमा अनुसन्धान नगरिए सोचे अनुसारको सफलता प्राप्त गर्न नसकिने बताए। उनले संघीय सरकारको मातहतमा रहेको इकाई कार्यालयलाई सहयोग गर्ने आश्वासन पनि दिए। परिषदलाई आवश्यक पर्ने हरेक प्रकारको सहयोग गर्न प्रदेश सरकार तैयार रहने प्रतिवद्धता समेत उनले व्यक्त गरे।