कांग्रेस सहमहामन्त्रीमा सीता गुरुङद्वारा उम्मेदवारी घोषणा

काठमाडौं- नेपाली कांग्रेसकी केन्द्रीय सदस्य सीता गुरुङले केन्द्रीय सहमहामन्त्री पदका लागि उम्मेदवारी घोषणा गरेकी छन्। गुरुङले आदिवासी जनजाति समूहतर्फको सहमहामन्त्री पदमा उम्मेदवारी दिने घोषणा गरेकी हुन्।

‘मैले लामो समयदेखि पार्टीमा काम गर्दै आएकी छु,’ गुरुङले भनिन्, ‘त्यही कारण मैले आदिवासी जनजातितर्फ सहमहामन्त्री पदका लागि मैले उम्मेदवारी दिने निर्णय गरेकी छु।’ यद्यपि आफूहरू अझै छलफलमा रहेको उनले बताइन्।

कांग्रेस विधानमा समावेशी समूहको प्रतिनिधित्व हुने गरी ८ जना महामन्त्री हुने व्यवस्था गरिएको छ। 

गत प्रतिनिधिसभा निर्वाचनमा तेह्रथुमबाट चुनाव लडेकी उनी बाम गठबन्धनका उम्मेदवारसँग पराजित बनेकी थिइन्। यसअघि २०७४ को देउवा सरकारमा भौतिक पूर्वाधार तथा यातायात राज्यमन्त्री बनेकी थिइन्। 

दुवै संविधानसभामा सदस्य रहेकी गुरुङ संविधान मस्यौदा समितिकी सदस्य समेत थिइन्। तेह्रथुममा नेविसंघबाट उनले राजनीति सुरु गरेकी थिइन्।