विवाहपञ्चमी महोत्सव अन्तर्गत मटकोर सम्पन्न

जनकपुरधाम- साताव्यापी विवाहपञ्चमी कार्यक्रम अन्तर्गत मंगलबार जनकपुरधाममा मटकोर सम्पन्न भएको छ। मटकोरमा जानकी मन्दिरबाट बाजागाजासहित जनकपुरको ऐतिहासिक गंगासागरमा पुगी बिहेको वेदी बनाउनका लागि माटो ल्याएका छन्।

उनीहरुले माटो बोकेर नगर परिक्रमा समेत गरेका थिए। मटकोरको क्रममा गंगासागरको डिलमा भजनकीर्तनको कार्यक्रम समेत राखिएको थियो। 

जानकीको प्रतीकको रुपमा रहेकी बालिकालाई लिएर गाजाबाजा सहित जानकी मन्दिरका उत्तराधिकारी महन्थ रामरोशन दास वैष्णव गंगासागर पुगेका थिए। वैदिक मन्त्र उचारण गरी विधिपूर्वक जानकी मन्दिरमा भित्रयाईएको माटोले रामजानकी विवाहका लागि विवाहको वेदी तयार गर्ने चलन रहेको छ।

जनकपुरधाममा सताव्यापी विवाहपञ्चमी महोत्सव अन्तर्गत पहिलो दिन नगर दर्शन, दोस्रो दिन फुलवारी लीला, तेस्रो दिन धनुष यज्ञ, चोथौ दिन तिलकोत्सव र पाँचौ दिन मटकोर कार्यक्रम सम्पन्न भएको हो। 

बिहीबार विवाहोत्सव र शुक्रबार रामकलेवा गरी महोत्सव सम्पन्न हुनेछ।