योगेश भट्टराईले भने- एमाले गैंडा जस्तै हो

चितवन- नेकपा एमाले सचिव योगेश भट्टराईले गैंडा र एमाले प्रवृत्ति समान रहेको बताएका छन्। उनले जाइलाग्नेलाई जसरी गैंडाले छोड्दैन त्यसरी एमालेले पनि नछोड्ने बताएका हुन्।

प्रेस चौतारी नेपाल चितवनले सोमबार गरेको पत्रकार सम्मेलनमा भट्टराईले एमालेलाई जिस्काए परिणाम राम्रो नआउने चेतावनी दिँदै जिस्काउनेलाई लखेट्ने धम्की दिए। 

चितवनमा हालै सम्पन्न पार्टीको १०औं महाधिवेशनको मस्कटमा एकसिंगे गैंडा राखेकोमा भएका आलोचना र टिप्पणीलाई लक्षित गर्दै उनले भने, ‘एमाले र गैंडामा केही समानाता भएरै गैंडा छानेको हो। गैंडालाई जिस्क्याउनुहुन्छ, हिर्काउन थाल्नुहुन्छ, त्यसले तपाईंलाई छोड्दैन, लेखट्छ, एमाले पनि त्यस्तै छ। जब एमालेमाथि जाइलाग्नुहुन्छ, तब एमालेले छोड्दैन।’ 

एमालेको शक्ति प्रदर्शनलाई एमालेले नै बाहेक अरूले तोड्न नसक्ने दाबी गरेका उनले महाधिवेशनबाट एमाले एकताबद्ध भएर अघि बढेको बताए । 

ताजा जनादेशबाट एमालेले सरकार बनाउने बताउँदै उनले पाँच दलीय गठबन्धनले देशमा बेथिति निम्त्याएकाले यसलाई चिर्न अब ताजा जनादेशमा जानुको विकल्प नरहेको दाबी गरे ।