प्रतिनिधिले नपत्याए मलाई कमिटी बाहिर बस्न आपत्ति छैन : भीम रावल

काठमाडौं– एमाले नेता भीम रावलले प्रतिनिधिहरुले पत्याएनन् भने आफूलाई कमिटी बाहिर बस्न कुनै आपत्ति नहुने बताएका छन्। एमालेको दसौं महाधिवेशनमा विर्नाचनमा मतदान सकिएपछि सञ्चारकर्मीसँग कुराकानी गर्दै उनले रावलले भने, ‘अध्यक्ष पदबाहेक अरु पदमा म जान्नँ। प्रतिनिधिले मत दिएनन् भने बाहिर बस्नु स्वाभाविकै हो।’

तपाईंका पक्षमा कति मत आउला भन्ने जिज्ञासामा उनले भने, ‘परिणाम आउन दिनुस् न, बरु तपाईंहरुलाई नै थाहा होला बताइदिनुस् न।’ निर्वाचनका क्रममा आचारसंहिता उल्लंघन गरिएकाले आफूले आपत्ति जनाएको उनको भनाइ छ। 

एमाले अध्यक्ष केपी ओलीले सोमबार सार्वजनिक गरेको ३०१ जनाको सूचीमा रावलको नाम केन्द्रीय सदस्यमा राखिएको थियो। उनले प्रतिस्पर्धामा पराजित भए आफू केन्द्रीय समितिमा नरहने बताए। उनले भने, ‘निर्वाचन परिणाम जे आए पनि स्वीकार्छु, तर केन्द्रीय समितिमा बस्दिनँ। केन्द्रीय सदस्यमा मेरो दाबी छैन। कसले मेरो नाम राखिदियो, थाहा भएन।’