उपमहानगरको बिजुली जडान गर्दा प्राधिकरण कर्मचारीको मृत्यु

बुटवल– बिजुली जडानका क्रममा बुटवलमा आइतबार दिउँसो एक जना कर्मचारीको मृत्यु भएको छ भने दुई जना गम्भीर घाइते भएका छन्।

बुटवल उपमहानगरपालिकाको नयाँ प्रशासकीय भवनमा विद्युत जडान गर्ने क्रममा करेन्ट लागेर नेपाल विद्युत प्राधिकरणका कर्मचारी ४७ वर्षिय वसन्त भुसालको मृत्यु भएको हो।  

अर्घाखाँचीको सन्धिखर्क नगरपालिका–९ घर भई हाल बुटवल गोलपार्क बस्दै आएका भुसालको अस्पताल पुर्याएलगत्तै मृत्यु भएको इलाका प्रहरी कार्यालय बुटवलले जनाएको छ। उपमहानगरको थ्रीफेज लाइन जडानका क्रममा उनलाई करेन्ट लागेको हो।

करेन्ट लागेर बुटवल–४ का २८ वर्षिय जितेन्द्र लोध र बर्दियाको राजापुर घर भई हाल बुटवल–३ बस्दै आएका २८ वर्षिय राजगोपाल चौधरी गम्भीर घाइते भएका इलाका प्रहरी कार्यालय बुटवलका प्रहरी निरीक्षक पंकज चुंदालीले जानकारी दिए।  घाइते दुवैको लुम्बिनी प्रादेशिक अस्पताल बुटवलमा उपचार भइरहेको छ।