राप्रपाले पारित गर्‍यो सामाजिक, राजनीतिक र आर्थिक कार्यपत्र

काठमाडौं- राष्ट्रिय प्रजातन्त्र पार्टीका त्रय अध्यक्षहरुको उपस्थितिमा भएको केन्द्रीय कार्य सम्पादन समितिको बैठकले सामाजिक, राजनीतिक र आर्थिक कार्यपत्र पारित गरेको छ। 

यही मंसिर १५ देखि १७ सम्म काठमाडौंमा हुने राप्रपाको एकता महाधिवेशनको सन्दर्भमा बिहीबार बसेको बैठकले सामाजिक, राजनीतिक र आर्थिक कार्यपत्र पारित गरेको हो। 

बैठकमा अध्यक्ष पशुपति शम्शेर जबराले 'सामाजिक कार्यपत्र', अध्यक्ष कमल थापाले 'राजनीतिक कार्यपत्र' र अध्यक्ष डा.प्रकाशचन्द्र लोहनीले 'आर्थिक कार्यपत्र' प्रस्तुत गरेको केन्द्रीय सचिवालय प्रमुख भास्कर भद्राले जानकारी दिए।

उनका अनुसार विधान संशोधन सुझाव समितिका संयोजक निरञ्जन थापाले प्रस्तुत गरेको विधान संशोधनसम्बन्धी मस्यौदा पनि परिमार्जनसहित पारित गरिएको छ।

त्यस्तै केन्द्रीय निर्वाचन समितिका संयोजक हरिबहादुर बस्‍नेतले निर्वाचन सम्बन्धी र कोषाध्यक्ष चन्द्र बहादुर गुरुङ्गले आयव्याय विवरण प्रस्तुत गरेका थिए।