सर्वोच्चमा १५ मंसिरदेखि गोलाप्रथाबाट पेशी तोकिने

काठमाडौं– सर्वोच्च अदालतमा यही मंसिर १५ गतेदेखि गोलाप्रथाबाट मुद्दाको पेसी तोकिने भएको छ। प्रधानन्यायाधीश चोलेन्द्र शम्शेर जबराबाहेकका न्यायाधीशहरूको फुलकोर्टको बिहीबार बसेको बैठकले १५ मंसिरबाट गोलाप्रथाबाट मुद्दाको पेसी तोक्ने निर्णय गरेको हो। 

गोलाप्रथासम्बन्धी नियमावली सोमबार राजपत्रमा प्रकाशित भएपछि बिहीबार फुलकोर्ट बैठक बसेर त्यसलाई कार्यान्वयन गर्ने गरी १५ मंसिरबाट लागू गर्ने निर्णय गरेको हो। गोला प्रथाबाट पेशी तोकिने भएसँगै प्रधानन्यायाधीशले आफ्नो तजबिजमा पेशी तोक्ने अधिकार कटौती भएको छ। 

गोलाप्रथाबाट पेसी तोक्न प्रधानन्यायाधीश चोलेन्द्र शमशेर जबरा राजी भएपछि १९ जना न्यायाधीश इजलासमा फर्किएका थिए। नेपाल बार एसोसीएसन भने प्रधानन्यायाधीश जबराको राजीनामा माग्दै आन्दोलन चर्काइरहेको छ। गोलप्रथा लागु हुँदैमा आन्दोलन नटुंगिने भन्दै जबराले राजीनामा दिनैपर्ने अडान बारले राख्दै आएको छ।