जनकपुरधाम– नेकपा (एकीकृत समाजवादी)का अध्यक्ष माधवकुमार नेपालले अब हुने निर्वाचनपछि एमाले चोइटिएर जाने दाबी गरेका छन्। नेकपा एकीकृत समाजवादी पार्टीको प्रदेश तथा धनुषा जिल्ला कार्यालय उद्घाटन गर्दै पूर्वप्रधानमन्त्री नेपालले निर्वाचनपछि एमाले खोज्नुपर्ने दिन आउने दावी गरे।
अध्यक्ष नेपालले केपी शर्मा ओली अहिले अत्यन्तै छटपटाइरहेको बताए। भने, ‘ओलीले अन्टसन्ट बोलेर आफ्नो चरित्र प्रदर्शन गरिरहेका छन्। हामी त्यसको पछि लाग्यौँ भने हाम्रै चरित्र उदांगो हुन्छ। गाली गर्न दिनुस्, म गाली गलौज गर्दिन। उहाँले आफ्नो चरित्र देखाइरहेका छन्, हामी राम्रो चरित्र संस्कार देखाउँछौँ।’
उनले सात वटा प्रदेशमध्ये दुई वटा प्रदेशमा आफ्नो पार्टीको सरकार रहेको र संघीय सरकारमा समेत बलियो रुपमा महत्वपूर्ण भूमिका निर्वाह गरिरहेको बताए। नेपालले प्रदेश २ मा समेत एमालेभन्दा आफ्नो पार्टी निकै बलियो रहेको दाबी गरे। अध्यक्ष नेपालले ओलीलाई सूर्यको धाक नलगाउन चेतावनी दिँदै भने, ‘अब सूर्यको धाक नदेखाए हुन्छ, सूर्यमा ग्रहण लागिसकेको छ। अब कलम चम्किरहेको छ। सत्य र न्यायको सन्देश दिइरहेको छ।’