कांग्रेस प्युठान सभापतिमा गिरी निर्वाचित

रूपन्देही- नेपाली कांग्रेस प्युठानको सभापतिमा बिष्णुकुमार गिरी निर्वाचित भएका छन्। मंगलबार भएको निर्वाचनमा शिवराज रिजाललाई ७२ मत अन्तरले पछि पार्दै गिरी सभापतिमा विजयी भएका हुन्। उनी पौडेल/सिटौला पक्षीय नेता हुन्।

सभापति पदका लागि खसेको १०६९ मतमध्ये गिरीले ५ सय ६६ मत ल्याएका थिए। रिजालले भने ४ सय ९४ मत प्राप्त गरेका थिए। ९ मत बदर भएकोमा गिरी ७२ मत अन्तरले विजयी भएका हुन्। 

नौबहिनी गाउँपालिका अध्यक्ष रिजाल पार्टीको पूर्व सचिवसमेत हुन् । गौमुखी गाउँपालिका अध्यक्ष गिरी निवर्तमान समितिको सचिव थिए। 

यसका साथै जिल्ला कार्यसमितिका सबै सदस्य र महाधिबेशन प्रतिनिधि सर्वसम्मत रुपमा चयन भएको निर्वाचन समितिले जनाएको छ।

जिल्ला उपसभापतिमा देवेन्द्र वर्मा, इश्वर सिंह विष्ट र सचिबमा टोपाराम कालाथोकी र नरेन्द्र पुन मगर, सहसचिबमा नारायण ज्ञवाली र प्रमोद पोखेल निर्विरोध चयन भएका छन्।