जनकपुरधाम- नेपाली कांग्रेसमा युवाहरुलाई अवसर दिइँदैन भन्ने गरिन्छ। तर, यस पटकको अधिवेशनबाट युवाहरुसमेत उल्लेख्य सहभागिता हुनु नेपाली कांग्रेसका लागि सुखद सन्देश हो। जनकपुरधाम उपमहानगरपालिका केही दिन अगाडि मात्रै सम्पन्न नगर अधिवेशनबाट एकजना युवा क्रियाशील सदस्यता पाएकै वर्षमा क्षेत्रीय प्रतिनिधि हुँदै नगर सचिवसम्म पुगेका छन्। उनी हुन् जनकपुरधाम उपमहानगरपालिका - ४ का निरजकुमार झा ‘गुड्डु’।
३६ वर्षीय निरज २०६१ सालमा नेपाल विद्यार्थी संघमा लागेर राजनीतिक यात्रा सुरु गरे। चार वर्ष नेविसंघको राजनीति गरेर तत्कालीन राजनीति दलका नेताहरुको रबैयाबाट विरक्तिएका उनी केही वर्ष सक्रिय राजनीतिबाट पछि हटे। यद्यपि माउ पार्टी नेपाली कांग्रेसका लागि काम गरिरहे । उनले भने ‘पार्टीका लागि निरन्तर काम गरिरहे त्यसकै प्रतिफल हो, कांग्रेसी साथीहरुले मलाई नगरमा काम गर्ने अवसर प्रदान गरेका छन् ।’ यसअघि पार्टीमा जातीय राजनीति हावी थियो तर अब आएर जातीय राजनीतिभन्दा पनि काम गर्ने सार्थीहरुलाई यस पटकको महाधिवेशनबाट अवसर दिइएको उनी बताउँछन् ।
कांग्रेसको १४औँ महाधिवेशनमा नगरमा झर्दै गइरहेको नेपाली कांग्रेसको स्थितिलाई फेरि उचाईमा पुर्याउने उद्देश्यले फेरि राजनीतिमा सक्रिय भएको उनको भनाइ छ। 'साथीभाईले जातीभन्दा माथि उठेर मलाई अवसर दिनुभएको छ,' उनले भने, 'उहाँहरुको विश्वास गुम्न दिने छैन।'