रावलजीले मलाई चुनौती दिनुभएको छैन, हामीबीच स्नेहपूर्ण सम्बन्ध छ : केपी शर्मा ओली

काठमाडौं- नेपाल कम्युनिस्ट पार्टी एमालेका अध्यक्ष केपी शर्मा ओलीले एमाले अध्यक्षका लागि उम्मेदवारी दिएर भीम रावलले आफूलाई चुनौती दिएको भन्ने कुरा गलत भएको दाबी गरेका छन। मंगलबार सम्पादकहरूसँग अन्तर्क्रियामा रावलले आफूलाई माया गर्ने तर चुनौती भने नदिएको ओलीले दाबी गरेका हुन्। 

'गलत व्याख्या गर्नु हुँदैन। रावलले मलाई चुनौती दिनुभएको छैन। मप्रति रावलजीले बढी माया गर्नुहुन्छ। उहाँले  कुनै चुनौती भन्नुभएको छैन। हामीबीच स्नेहपूर्ण सम्बन्ध छ। उहाँको स्नेहपूर्ण सुझावबाट म उत्साहित छु,' उनले भने, 'यो सुझाव एक खाले मान्छेहरूले मन पराउने सुझाव पनि हो। मलाई विश्राम लिनुपर्ने सुझाव दिनुभएको होइन।'

विधिपद्धतिसम्मत चुनौती दिएमा आफूले त्यसलाई स्वागत गर्नेसमेत उनले बताए। उनले लोकतन्त्रमा चुनौती स्वाभाविक भएको समेत उल्लेख गरेका थिए। 'लोकतन्त्रमा चुनौती स्वाभाविक हो। मविरुद्ध कोही उठ्छ भने म त्यसलाई नउठे हुन्थ्यो भन्ने पक्षमा छैन। म कसैलाई पनि दबाब दिन्नँ।'

एमालेले  मंसिर १० गते चितवनमा महाविधेशनको उद्धाटन गर्ने तयारी गरेको छ। ओलीले एमालेमा सर्वसम्मत नेतृत्व चयन गर्नुपर्नेमा जोड दिँदै आएका थिए। तर रावलले पनि अध्यक्ष पदमा उम्मेदवारी घोषणा गरेपछि ओलीको उक्त चाहनामा ब्रेक लागेको छ।