देउवा पक्ष गलत मानसिकताका साथ अघि बढ्यो, निर्वाचन समिति निष्पक्ष छैन : कोइराला

विराटनगर- नेपाली कांग्रेसका नेता डा. शेखर कोइरालाले सभापति शेरबहादुर देउवा पक्ष मानसिकताका साथ अघि बढेको र १४औं महाधिवेशनका लागि बनाइएको निर्वाचन समिति निष्पक्ष नभएको आरोप लगाएका छन्। सोमबार विराटनगरस्थित कोइराला निवासमा सञ्चारकर्मीसँग कुरा गर्दै उनले निर्वाचन समिति निष्पक्ष नभएको आरोप लगाएका हुन्। 

१४औं महाधिवेशन निष्पक्ष र धाँधलीरहित भनेर सभापति शेरबहादुर देउवाले भने पनि त्यसविपरीतका गतिबिधि भइरहेको उनको भनाइ छ। सभापतिकै निर्देशनमा निर्वाचन समिति गलत तरिकाले अघि बढेको कोइरालाले आरोप लगाए। उनले भने, ‘डडेल्धुरामा ३ जना निर्वाचन अधिकृत परिवर्तन गरेर अधिवेशन गराइएको घटनाबाटै अधिवेशन कसरी भइरहेको स्पष्ट हुन्छ।’  

डडेल्धुरा र सर्लाहीको निर्वाचनले निर्वाचन समितिमाथि प्रश्न उठेको उनले बताए। प्रधानमन्त्री र देउवा र गृहमन्त्री बालकृष्ण खाँणको जिल्लामा नै कुटपिट गरेर चुनाव गराइएको आरोप लगाउँदै उनले सभापति देउवा पक्ष गलत मानसिकताबाट अगाडि बढेको बताए।

देउवाकै कारण तोकिएकै समयमा महाधिवेशन नभएको  उनको जिकिर छ।