जनकपुरधाम– प्रदेश २ को सरकारमा नेकपा (एकीकृत समाजवादी) सहभागी भएको एक दिन नबित्दै सोही दलकी प्रदेशसभा सदस्य मञ्जु यादवले प्रदेश सरकारविरुद्ध आक्रोश पोखेकी छन्। प्रदेश सरकारको मन्त्रीमण्डलमा महिला सहभागिता नगराइएको भन्दै उनी प्रदेश सरकारका साथै आफ्नै दलविरुद्ध आक्रोशित देखिएकी हुन्।
यादवले सामाजिक सञ्जालमा स्टाटस लेख्दै मुख्यमन्त्री लालबाबु राउतप्रति आक्रोश पोखेकी छन्। पार्टी नेतृत्वले समेत महिलालाई बेवास्ता गर्दै प्रदेश सरकारमा सहभागी भएपछि उनले आफ्नो असन्तुष्ट पोख्दै मुख्यमन्त्री तथा मन्त्रीपरिषद्मा एकजना पनि महिलालाई क्याबिनेट मन्त्री नबनाएको प्रति मुख्यमन्त्री राउत र जसपा अध्यक्ष उपेन्द्र यादवप्रति आक्रोश पोखेकी हुन्।
उनले मुख्यमन्त्री राउतले संविधानलाई कागजको खोस्टा बनाएको भन्दै यो लज्जास्पद विषय भएको बताएकी छन्। सामाजिक सञ्जालमा प्रदेश सांसद यादवले लेखेकी छन्, ‘जुन संविधानको आधारमा लालबाबु राउतजी मुख्यमन्त्री बन्नुभएको छ, त्यहि संविधानलाई कागजको खोसटो बनाइदिनु भएको छ। उहाँको क्याबिनेटमा महिला नहुनु लज्जाको विषय हो कि होइन? यो कुरा मधेशी मसिहा उपेन्द्र यादव लगायत सबै सरोकारवालासँग मेरो प्रश्न छ।’