न्युजिल्यान्डविरुद्ध भारतको क्लिन स्विप

काठमाडौं- कोलकत्तामा आइतबार राति सम्पन्न खेलमा भारतले न्युजिल्यान्डलाई ७३ रनले हराएको छ। रोहित शर्माको कप्तानीमा रहेको टिमले न्युजिल्यान्डलई लगातार तेस्रो खेलमा हराउँदै तीन खेलको सिरिज पनि क्लिन स्विप गरेको छ।

तेस्रो खेलमा टस जितेर ब्याटिङ रोजेको भारतले पुरा ओभर खेल्दै ७ विकेट गुमाएर १८४ रन बनाएको थियो। जवाफमा न्युजिल्यान्ड १७ ओभर २ बलमै सम्पूर्ण विकेट गुमाएर १११ रन मा समेटियो।

भारतका लागि कप्तान शर्माले ५६ रन बनाए भने अर्का ओपनर इशान किसनले २९ रनको योगदान दिए। त्यस्तै, श्रेयस अयरले २५ र दिपक चहरले २१ रन बनाए।

यता न्युजिल्यान्डका मिचेल सन्तनरले तीन विकेट लिए भने ट्रेन्ट बोल्ट, एडम मिल्न, लकी फग्र्युसन र इश सोधिले समान १,१ विकेट गिराए।

जवाफमा न्युजिल्यान्डका मार्टिन गुप्तिलले ५१ रन बनाएर आउट भए। भारतका अक्षर पटेलले तीन, हर्षल पटेलले दुई विकेट लिए भने दिपक चहर, युजवेन्द्र चहल र वेन्कटेस अयरले समान १,१ विकेट गिराए।

सिरिजको पहिलो खेलमा पाँच विकेटको जित निकालेको इन्डियाले दोस्रो खेलमा न्युजिल्यान्डलाई ७ विकेटले हराएको थियो। यससँगै इन्डियाले पछिल्ला ६ टी २० खेलमा लगातार जित निकालिरहेको छ।