जनकपुरधाम- धनुषाको मुखियापट्टी मुसहरनियाको वडा अधिवेशनमा हस्तक्षेप गर्न खोजेपछि नेपाली कांग्रेसका कार्यकर्ताहरु प्रदेश २ को भौतिक पूर्वाधार विकासमन्त्री रामसरोज यादवलाई घेराउ गरेका छन्। मन्त्री यादवकै वडामा उनकै कार्यकर्ताहरुले घेराउ गरेका हुन्।
बुधबार मुखियापट्टि मुसहरनियामा मन्त्री यादवले जबरजस्ती वडा अधिवेशन गराउन खोज्दा स्थानीय कांग्रेसी कार्यकर्ताहरुले उनलाई घेराउ गरेका हुन्।
मन्त्री यादवले लुकाएर गोप्य स्थानमा आफ्ना गुटका कार्यकर्तालाई मात्रै बोलाएर मतदान गराइरहेको थाहा पाएपछि स्थानीय कार्यकर्ताहरुले घेराउ गरेको कांग्रेसका स्थानीय नेता विनोदकुमार यादवले जानकारी दिए। मुखियापट्टी मुसहरनिया वडा नम्बर ५ र ६ मा प्रहरीको सहयोगमा एकलौटी रुपमा माइन्युट गरेर मन्त्री यादवले वडा अधिवेशन गर्न खोजेपछि विवाद उत्पन्न भएको हो।
मन्त्री यादवले पावरको आडमा अलोकतान्त्रिक र तानाशाही विधिबाट अधिवेशन गराउन खोजेपछि आफुहरुले अधिवेशन रोक्न खोजेको स्थानीय कांग्रेसका कार्यकर्ता जयप्रकाश यादवले बताए। उनले मन्त्री यादव प्रहरी चौकीमा रहेको र उनलाई त्यही घेरेर राखेको बताए।
सो क्रममा नेपाली कांग्रेसका कार्यकर्ताहरु तथा प्रहरी बीच सामान्य झडप समेत भएको थियो।
मन्त्री यादवकै हस्तक्षेपका कारण मुखियापट्टी मुसहरनिया गाउँपालिका वडा नम्बर ५ र वडा नम्बर ६मा समेत वडा अधिवेशन हुन सकेको छैन। धनुषाका बाँकी वडाहरुमा अधिवेशन सम्पन्न भइ सकेको छ।