एसलाई सरकारमा ल्याउन मुख्यमन्त्री राउतले हटाए पर्यटनमन्त्री राय

जनकपुरधाम- नेकपा (एकीकृत समाजवादी- एस)लाई प्रदेश २ सरकारमा सामेल गराउन मुख्यमन्त्री लालबाबु राउतले एक मन्त्रीलाई पदमुक्त गरेका छन्। 

मुख्यमन्त्री राउतले उद्योग, वन तथा पर्यटन मन्त्री रामनरेश रायलाई राजीनामा दिन दिएको निर्देशनको २ दिन नबित्दै पदमुक्त गरिएको हो।

मन्त्री राय राजीनामा दिन तयार नभएपछि मुख्यमन्त्री कार्यालयले रायलाई पदमुक्त गरिएको पत्र प्रदेश २ को प्रदेश प्रमुख कार्यालयलाई पठाएको छ। प्रदेश प्रमुखको कार्यालयका उपसचिव होम प्रसाद घिमिरेले करिब २ बजे मन्त्री रायलाई पदमुक्त गरिएको पत्र प्राप्त भएको जानकारी दिए। 

मुख्यमन्त्री राउतले संविधानको धारा १६९ को उपधारा ३ को खण्ड 'ख' बमोजिम उनलाई पदमुक्त गरेका छन्। यसअघि राय आफ्नो मन्त्री पद पद बचाउनकै लागि जसपा विभाजन हुँदा महन्थ ठाकुरको साथ छोडेका थिए।