जनकपुरधाम– जनकपुरधाम उपमहानगरपालिका वडा नम्बर २० का वडा सदस्यलाई एक समूहले कुटपिट गरेपछि उत्पन्न तनावका कारण त्यहाँ लगाइएको निषेध आदेश मंगलबारसम्मका लागि बढाइएको छ।
धनुषाका प्रमुख जिल्ला अधिकारी बन्धु प्रसाद बास्तोलाले विज्ञप्ति जारी गर्दै आइतबार जनकपुरधाम उपमहानगरपालिका वडा नम्बर २० मा लगाइएको निषेध आदेशलाई मंगलबार राति १० बजेसम्मको लागि बढाउने निर्णय गरिएको जनाएका छन्।
देवपुरा रुपैठास्थित तेलिया पोखरीमा अर्घ राख्नका लागि निर्माण गर्न लागेको घाटको विषयमा हिन्दू–मुस्लिम समुदायबीच विवाद भएको थियो। सो विवादले शनिबार उग्ररुप लिएपछि स्थानीय प्रशासनले शनिबार दिउँसोदेखि आइतबार राति १० बजेसम्मका लागि निषेध आदेश जारी गरेको थियो।
तर आइतबार जनकपुरधाम उपमहानगरपालिका वडा नम्बर २० का सदस्य महावीर महतोलाई कुटपिट गरेपछि स्थानीय प्रशासनले निषेध आदेशलाई मंगलबार राति १० बजेसम्मका लागि थप गरेको हो। स्थानीयको एक समूहले कुटपिट गरेपछि घाइते भएका वडा सदस्य महतो प्रादेशिक अस्पतालमा उपचार गराएर घर फर्केका छन्।
जिल्ला प्रशासन कार्यालय धनुषाले देवपुरा रुपैठा स्थित पूर्वमा जलाद नदीको कर्ली बाँध, पश्चिममा जनकपुर–जटही मार्ग दोबाटो, उत्तरमा हनुमाननगर रामपुर बहुअर्वा जाने बाटो र दक्षिणमा देवपुरा निमचौकदेखि बहुअर्वा जाने बाटोसम्म निषेध आदेश जारी गरिएको छ।