रामचन्द्र पौडेलको नेतृत्वमा राजनीतिक संयन्त्र बनाउने गठबन्धनको निर्णय

काठमाडौं- सत्ताधारी पाँच राजनीतिक दलले नेपाली कांग्रेसका वरिष्ठ नेता रामचन्द्र पौडेलको नेतृत्वमा राजनीतिक संयन्त्र बनाउने निर्णय गरेका छन्।

प्रधानमन्त्री निवास बालुवाटारमा सोमबार साँझ बसेको गबन्धन्धनको बैठकले ११ सदस्यीय संयन्त्र गठन गर्ने निर्णय गरेको हो।संयन्त्रमा सत्ता गठबन्धनमा रहेका ५ वटा पार्टीबाट २/२ जना सदस्य रहनेछन्। सरकारको प्रतिनिधिका रूपमा सञ्चारमन्त्री ज्ञानेन्द्र कार्की पनि संयन्त्रका सदस्य रहनेछन्।

सबै राजनीतिक दलहरुले २/२ महिना संयोजन गर्ने सो समन्वय समितिमा कांग्रेसका तर्फबाट रामचन्द्र पौडेल र कृष्णप्रसाद सिटौला, माओवादी केन्द्रका तर्फबाट अध्यक्ष पुष्पकमल दाहाल प्रचण्ड र नारायणकाजी श्रेष्ठ छन् भने नेकपा (एकीकृत समाजवादी)को तर्फबाट माधवकुमार नेपाल, जनता समाजवादी पार्टीका तर्फबाट उपेन्द्र यादव, राष्ट्रिय जनमोर्चाका तर्फबाट चित्रबहादुर केसी र दुर्गा पौडेल छन्। 

पौडेलले दुई महिना संयन्त्रको नेतृत्व गर्नेछन् भने त्यसपछि आलोपालोमा गठबन्धनमा आबद्ध पार्टीले त्यसको नेतृत्व गर्ने सहमति भएको छ।