कार्यपालिका बैठक डाक्न माग गर्दै जनकपुरका वडाध्यक्षले बुझाए ज्ञापनपत्र

जनकपुरधाम– जनकपुरधामका केही वडाध्यक्षहरुले नगर कार्यपालिकाको बैठक बोलाउनुपर्ने माग गर्दै उपप्रमुख रीताकुमारी मिश्रलाई ज्ञापनपत्र बुझाएका छन्। 

नगरप्रमुख लालकिशोर साहका कारण जनकपुरधाम उपमहानगरपालिकामा विगत ५ महिनादेखि कार्यपालिकाको बैठक बस्न नसकेको उपमहानगरका १२ जना वडाध्यक्षहरुको आरोप छ। 

नगरकार्यपालिकाको बैठक प्रत्येक महिनाको एकपटक बोलाउनुपर्ने कानुनी व्यवस्था भए पनि विगत पाँच महिनादेखि उपमहानगरपालिकाको कार्यपालिका बैठक नबोलाइएको वडा नम्बर–३ का वडाध्यक्ष दीपेन्द्र साहले बताए। 

उनले सात दिनभित्र कार्यपालिका बैठक बोलाई नगरभित्रको फोहोर व्यवस्थापनबारे छलफल गराएर कानुनबमोजिम निर्णय गरिदिन माग गरेका छन्। 

उनीहरुलेआफूहरुका माग बेवास्ता गरिए थप कदम अगाडि बढाउने चेतावनी  दिएका छन्। वडा नम्बर–१, ३, ४, ६, ७, ८, ९, ११, १६, २०, २२ र २४ का वडाध्यक्ष र श्यामा झा तथा चञ्चला देवीलगायत कार्यपालिका सदस्यले उपप्रमुख मिश्रलाई ज्ञापनपत्र बुझाएका छन्।