उठेन जनकपुरधामको फोहोर, वडाध्यक्षहरूको आन्दोलन जारी

जनकपुरधाम- दीपावलीमा घर टोल सरसफाइ गर्ने गरिन्छ। तर, दीपावलीको पूर्वसन्ध्यामा पनि लाग्दैन जनकपुरधामलाई दीपावलीले छोएको छ। जनकपुरधामका वडाध्यक्षहरूको संघर्षका बाबजुद  चोक-चोकमा फोहोरको डंगुर छ।

अन्य समयमा नभए पनि कम्तीमा दीपावलीमा सर्वसाधारणले विशेष सरसफाइ गर्ने गर्छन्। तर, उपमहानगरपालिकाले नगर सरसफाइ तर्फ चासो नै दिएको छैन। उपमहानगरपालिकाले सडकबाट फोहर नउठाएपछि दीपावलीमा समेत नगर दुर्गन्धित हुने भएको छ।

जनकपुरधाम उपमहानगरपालिकाले सरसफाइको नाउमा लाखौं खर्च गरे पनि सरसफाइ भने हुने गरेको छैन। उपमहानगरपालिकासँग १ सय भन्दा बढी सफाइ कर्मचारी छन्।

उपमहानगरले फोहर नउठाएपछि केही दिन अगाडी मात्रै वडाध्यक्षले फोहर उठाएर नगर प्रमुख लालकिशोर साहको घर अगाडी थुपारेका थिए। त्यसपछि उपमहानगरपालिकाका निमित्त प्रमुख प्रशासकीय अधिकृत मेहिलाल र आन्दोलनरत्त वडाध्यक्षहरू बीच तीन दिन भित्र फोहर उठाउने सहमति भएको थियो। तर, सहमति भएको तीन दिन बितिसक्दा समेत फोहोर उठ्न सकेको छैन।

उपमहानगरले आर्थिक वर्ष २०७६/७७ मा तिहार, छठ र विवाहपञ्चमीको लागि विशेष सरसफाइको नाउँमा २० लाख रुपैयाँ विभिन्न संघ संस्था तथा व्यक्तिलाई दिएको महालेखापरीक्षकको प्रतिवेदनले उल्लेख गरेको छ।

जनकपुरधामकी उपप्रमुख रिताकुमारी मिश्रले नगरप्रमुखकै कारण जनकपुरधामको सरसफाइ हुन नसकेको आरोप लगाइन्।

यता नगरको फोहोर नउठेपछि वडाध्यक्षहरू कडा संघर्ष गर्ने चेतावनी दिएका छन्। जनकपुरधाम उपमहानगरपालिका वडा नम्बर ७ का वडाध्यक्ष जानकीराम साहले फोहोर नउठेपछि एक चरण फेरी छलफल गर्ने योजना रहेको बताए। छलफलबाट पनि फोहोर उठाउने सम्बन्धमा निकास ननिस्के कडा संघर्ष गर्ने वडाध्यक्ष साहको चेतावनी छ।