सिके राउतका १७ कार्यकर्ताविरुद्ध ‘आपराधिक उपद्रव’ मुद्दा

काठमाडौं-  सिके राउत नेतृत्वको जनमत पार्टीका १७ कार्यकर्ताविरुद्ध प्रहरीले आपराधिक प्रवेश र आपराधिक उपद्रवसम्बन्धी कसुरमा मुद्दा चलाएको छ।

खानेपानी तथा ढल निकास कार्यालय जनकपुरका प्रमुख राजेश कुशवाहालाई बन्धक बनाई दुर्व्यवहार गरेको भन्दै जनमत पार्टीका १७ कार्यकर्ताविरुद्ध शुक्रबार मुद्दा दर्ता गरेको हो। 

कुशवाहालाई बिहीबार दुर्व्यवहार गरेका १७ जनाविरुद्ध सरकारी वकिलको कार्यालयमार्फत मुद्दा दर्ता गरिएको जिल्ला प्रहरी कार्यालय धनुषाले जनाएको छ।

जनकपुरधाम उपमहानगरपालिका–८ स्थित बलवा टोलमा पार्टी अध्यक्ष राउतको बसोबास रहेको घरछेउको सडकमा खनिएको ढलको खाल्डो नपुरेको भन्दै कार्यालय प्रमुख कुशवाहामाथि उनका कार्यकर्ताले दुर्व्यवहार गरेका थिए।

मुद्दा दर्ता गरिएकामा जनमत पार्टी धनुषाका अध्यक्ष ओमविक्रम कुशवाहा, सर्लाही जिल्ला सदस्य दुर्योधन यादव, प्रेमकिशोर यादव, केन्द्रीय सदस्य वीरेन्द्र महतो, विद्यार्थी जनमत संघका अध्यक्ष विजय यादव, नेता सञ्जय प्रधान, धनिकलाल कापर, विक्रमकुमार साह, कैलाशप्रसाद साह, दिनेश रजक साफी, रामकरण यादव, सञ्जयकुमार सिंह, सञ्जय साह, महेशकुमार यादव, अमरनाथ साह र सुन्दर जिल्ला प्रहरीका प्रवक्ता डीएसपी जितेन्द्र बस्‍नेतले जानकारी दिएका छन्। 

उनका अनुसार यो मुद्दामा अधिकतम ४ वर्ष कैद र ४० हजार रुपैयाँसम्म जरिवाना गरिने प्रावधान छ।