जनकपुरधाम– प्रदेश २ सरकारले अविरल वर्षा तथा हावाहुरीका कारण कृषि बालीमा क्षति पुगेका किसानहरुलाई राहत उपलब्ध गराउने तयारी गरेको छ। भूमि व्यवस्था, कृषि तथा सहकारी मन्त्रालयले आयोजना गरेको पत्रकार सम्मेलनमा मन्त्री विजय यादवले बालीनालीमा पुगेको क्षतिबारे विवरण संकलनपछि राहत उपलब्ध गराइने जानकारी दिए।
यही कात्तिक १ र २ गते बेमौसमी रुपमा भएको बदलावका कारण अविरल वर्षा तथा हावाहुरीको प्रभावबाट कृषि बालीनालीमा परेको नकारात्मक प्रभावप्रति मन्त्रालयको गम्भीर ध्यानाकर्षण भएको जनाउँदै विवरण संकलन गर्ने कार्य सुरु गरिएको मन्त्री यादवले जानकारी दिए।
भूमि व्यवस्था, कृषि तथा सहकारी मन्त्री यादवले डाटा संकलनपछि प्रदेश सरकारले राहत उपलब्ध गराउने जानकारी दिए। उनले भने, ‘डाटा नै संकलन नगरी राहत घोषणा गर्न सकिँदैन, हामी क्षतिको यकिन विवरण संकलन गरिरहेका छौं, त्यसपछि सरकारले राहत घोषणा गर्नेछ।’
उनले वर्षा तथा हावाहुरीको प्रभावबाट सम्पूर्ण प्रदेशवासीमा आर्थिक तथा मानसिक तनावको अवस्था आएको बताउँदै सरकारले किसानहरुका लागि राहतको घोषणा चाँडै गर्ने प्रतिवद्धता व्यक्त गरे। ‘यस प्रदेशमा यो वर्ष करिब ४ लाख ३ हजार हेक्टरमा धान रोपाइँ भएको थियो। धानबाली भित्र्याउने बेलामा आएको अविरल वर्षाले किसानको मिहिनेत तथा लगानी खेर जाने हो कि भन्ने डर आउनु स्वभाविक नै हो। हालसम्म प्राप्त सूचना अनुसार फाटफुट रुपमा कटानी भएको पाजा (पसही) खेतमा नै डुबेको, हावाको बेगका कारण लामो उचाइ भएका जातहरु ढलेको बारे सूचनाहरु प्राप्त भइरहेको छ,‘ उनले भने।
खेतमा फलेको तरकारी बालीमा नोक्सानको साथै दलहन र तेलहन बाली लगाउन बाधा पर्न सक्ने र अहिले विभिन्न तरकारीका बेर्नाहरु नर्सरीमा हुर्काउने समय भएकोले उक्त बेर्नाको ब्याडहरुमा पानी जमेको जानकारीमा आइरहेको मन्त्रालयले जनाएको छ।
त्यस्तै, पशुपन्छीको सन्दर्भमा हालसम्म क्षतिको जानकारी प्राप्त नभएको तर मत्स्य पोखरीका डिलहरुमा फाटफुट क्षति पुगेको मन्त्री यादवले बताए। क्षतिको यथार्थ विवरण यकिन गर्न स्थानीय तहको ठूलो भूमिका रहेकोले उक्त कार्यमा प्रदेश सरकारलाई सहकार्य तथा सहयोग गर्न समेत मन्त्री यादवले अनुरोध गरे।