हुम्लाको तुम्लिङमा १२ जना हिमपातमा फसे

सुर्खेत– पदयात्राका लागि हुम्लाको हिल्सा र लिमी उपत्यका गएका चार विदेशीसहित १२ जना तुम्लिङको हिमपातमा फसेका छन्। हुम्ला पुगेका स्लोभेनियाका चार पर्यटक, तीन जना टुरगाइड र पाँच जना स्थानीय नागरिक नाम्खा गाउँपालिका–६ को लिमी क्षेत्रको तुम्लिङमा फसेको जिल्ला प्रशासन कार्यालय हुम्लाले जनाएको छ। 

पदयात्रा सकेर सिमकोट फर्कंदै गर्दा बाक्लो हिमपात भएपछि मंगलबारदेखि तुम्लिङमा फसेको प्रमुख जिल्ला अधिकारी गणेश आचार्यले जानकारी दिए।

‘हिमपात भएपछि न्यालु लेकको बाटो अवरुद्ध भएको छ’, आचार्यले भने, ‘चारजना पर्यटकसहित १२ जना नागरिक तुम्लिङमा फसेका छन्।’ उनीहरुको उद्दारका लागि प्रशासनले बुधबार नै गृह मन्त्रालयले पत्राचार गरेको तर बुधबार मौसम सफा नभएपछि उद्धार हुन नसकेको आचार्यले बताए।

 ‘हामीले बुधबार नै हेलिकोप्टरबाट उद्दार गर्न भनेको थियौं’, उद्धारमा एयर डाइनेस्टीको हेलिकोप्टर आउने कुरा थियो’, आचार्यले भने, ‘तर मौसम सफा नभएपछि उद्धार हुन सकेन।’ तुम्लिङमा केही होटल छन्।

हिमपातमा फसेका पर्यटकसहितका नागरिक तुम्लिङमै सुरक्षित छन्। हिमपात नफाटे आज दिउँसोसम्म उद्धार हुनसक्ने आचार्यले बताए। तुम्लिङबाट सिमकोट आउने मुख्य बाटो न्यालु लेकमा बाक्लो हिमपातका कारण चार दिनदेखि अवरुद्ध छ। हिमपातमा फसेका नागरिक टे«किङका लागि असोज २२ गते सिमकोट हुँदै हिल्सा पुगेका थिए।