हुम्लामा पहिरोले घर पुरिँदा एकै घरका ६ जना बेपत्ता

सुर्खेत- हुम्ला पहिरोले घर पुरिँदा ६ जना बेपत्ता भएका छन्। पहिराले खार्पुनाथ गाउँपालिका ५ खर्पेलगाउँका धनविरे शाहीको घरमा पुरिँदा उनीसहित कलबहादुर शाही, धोक्ची शाही, हुमेश शाही, अलिन्द शाही र दुई वर्षिय नाबालक बेपत्ता भएका हुन्।

कलबहादुर र धोक्ची श्रीमान् श्रीमती हुन् भने हुमेश र दुई वर्षे नाबालक उनीहरूकै छोराहरू हुन् । मंगलबार राति ८ बजेतिर घर माथिबाट आएको पहिरोले परिवारका सबै सदस्यलाई पुरेको जिल्ला प्रहरी कार्यालय हुम्लाले जनाएको छ । वर्षा नरोकिएको र रात परिसकेका कारण बेपत्ताको खोजी गर्न समस्या भएको हुम्लाका डीएसपी हेरम्भ शर्माले जनाए।

पहिरोले घर पुरिँदा ६ जना बेपत्ता भएको जानकारी आएको छ। स्थानीयलाई उद्धारमा खटिना भनेका छौ तर रात परिसकेका कारण उद्धारमा कठिनाइ भएको छ।  टेलिफोनको समस्या, निरन्तरको वर्षा र रातिको समय भएका कारण प्रहरी घटनास्थल पुग्न सकेको छैन।

सदरमुकाम सिमकोटबाट घटनास्थल झण्डै चार घण्टाको पैदल दुरीमा छ । घटनास्थल नजिकै रहेको याङचु प्रहरी चौकीमा हिमपात र वर्षाका कारण टेलिफोन सम्पर्क हुन सकेको छैन । तीन दिनदेखि परेको अविरल बर्षाका कारण हुम्लाको उत्तरी भेगमा हिमपात भएको छ।