कात्तिक ९ मा तय गरिएको प्रतिनिधि सभाको बैठक ११ गतेसम्मका लागि स्थगित

काठमाडौं- प्रतिनिधिसभाको कात्तिक ९ गते बोलाइएको बैठक कात्तिक ११ गतेसम्मका लागि स्थगित गरिएको छ। उक्त बैठक दुई दिनपछि सार्दै कात्तिक ११ गते दिउँसो २ बजे बोलाइएको संसद् सचिवालयले जनाएको छ।

यसअघि बसेको प्रतिनिध सभाको बैठकमा सभामुख अग्‍निप्रसाद सापकोटाले कात्तिक ९ गने दिउँसो १ बजेका लागि बैठक बोलाएका थिए। तर, मंगलबार एक सूचना जारी गर्दै विशेष कारणवश भनेर उक्त बैठक स्थगित गरिएको हो। 

सचिवालयले जारी गरेको सूचनामा भनिएको छ, ‘२०७८ कात्तिक ९ गते मंगलबार दिनको १ बजे बस्ने गरी निर्धारण भएको प्रतिनिधिसभाको बैठक विशेष कारणवश सो दिन र समयमा बस्न नसक्ने भएकाले प्रतिनिधिसभा नियमावली, २०७५ को नियम ६ को उपनियम (३) बमोजिम सभामुखज्यूले २०७८ कात्तिक ११ गते बिहीबार दिनको २ बजे बस्ने गरी निर्धारण गर्नुभएको व्यहोरा माननीय सदस्यहरूको जानकारीका लागि यो सूचना प्रकाशित गरिएको छ।'

प्रतिनिधि सभाका पछिल्ला बैठकहरुमा नेकपा एमालेले लगातार अवरोध गर्दै आइरहेको छ। एमालेको अवरोधका बीच पनि संसद् बैठक सञ्‍चालन भइरहेको थियो। एमालले पार्टीले कारबाही गरेका १४ जना सांसद्लाई सभामुखले पनि कारबाही गरेको सूचना जारी गर्नुपर्ने माग गरिरहेको छ।