‘औंला औंलामा अष्ट्रेलिया’ बिमोचन 

काठमाडौं- मदन पुरस्कार विजेता युवराज नयाँघरेको नयाँकृति ‘औंला औंलामा अष्ट्रेलिया’ को विमोचन १५ गते शुक्रबार राजधानीमा एक कार्यक्रमबिच सम्पन्न भएको छ।

नियात्राकार नयाँघरे अष्ट्रेलियाको यात्राको क्रममा देखेका र भेटेका पात्रहरूलाई निबन्धमा उतारेको बताउदै मदन पुरस्कार विजेता कृष्ण धरावसीले थप्छन्, ‘यात्रा गर्न रूचाउने र यात्राका क्रममा देखिएको समाजको चित्रण निबन्धात्मक शैलीमा लेख्ने खुबी नयाँघरमा छ।’
 
साथै धरावसीले कही न कही हिडिरहने नयाँघरेको स्वभाव बताउदै पुस्तक र लेखकलाई एकमुष्ट शुभकामना व्यक्त गरेका थिए। अर्का लोकप्रिय युवा कथाकार महेश पौड्यालले किताबमाथि बोल्दै भने, ‘नेपालीहरूले अष्ट्रेलियामा बसेर गरेको संघर्ष सुखदुःख र नेपाललाई सम्झेर गरिने हार्दिकता समेटिएको छ।’
 
अष्ट्रलियाका आदिबासीहरूले गरेको संघर्ष र तिनको तिनको संरचनालाई पनि नियात्रामा उठाउन खोजिएको बताए। १८ ओटा साहित्यिक कृति लेखिसकेका नयाँघरले औंला औंलामा अष्ट्रेलिया छैंटौ नियात्रा हो । यस निबन्ध संग्रहमा ३३ थान निबन्ध रहेको छ।
 
कार्यक्रमको प्रमुख अतिथि शताब्दी पुरुष सत्यमोहन जोशीले गरेका थिए। कार्यक्रमलाई कवि मणि लोहनीले सञ्चलान गरेका थिए।