भैरहवाले चितवनलाई हराएपछि रोमाञ्चक बन्दै क्वालिफायरको समीकरण

काठमाडौं– एभरेस्ट प्रिमियर लिग (ईपीएल)को आज सोमबार सम्पन्न पहिलो खेलमा लिग तालिकाको शीर्षस्थानमा रहेको चितवन टाइगर्सले भैरहवा ग्लाडिएटर्ससँग ६ विकेटको हार बेहोरेको छ।

टस जितेर ब्याटिङ सुरु गरेको चितवनले पुरा ओभर खेल्दै आठ विकेट गुमाएर १६४ रन बनाएको थियो। १६५ रनको लक्ष्यका साथ खेल सुरु गरेको भैरहवाले १३ बल बाँकी रहँदै चार विकेट गुमाएर लक्ष्य पुरा गरेको हो।

चितवनलाई भैरहवाले हराएपछि दोस्रो र तेस्रो स्थानमा रहेका भैरहवा र पोखरा राइनोजको क्वालिफायर भिडन्त रोमाञ्चक बनेको छ। सोमबारको जितसँगै भैरहवाले छ अंक बनाएको छ। शीर्षस्थानको चितवनको ८ अंक छ। अझै एक खेल बाँकी रहेको भैरहवा र पोखराले प्ले अफका लागि प्रतिस्पर्धा गर्ने छन्।

दुवै टिमले जित निकालेको अवस्थामा भैरहवा क्वालिफायरमा जानेछ। नभएर जित्ने टिमले क्वालिफायरमा चितवन टाइगर्सको सामना गर्नेछ। लिग चरणका शीर्ष दुई टिमले क्वालिफायरमा प्रतिस्पर्धा गर्नेछन्। चितवनले लगातार चार खेलमा जित निकाल्दै क्वालिफायरमा स्थान पक्का गरेको थियो।

आजको खेलमा भैरहवाको जितका लागि प्रदीप ऐरीले ७२ रनको अर्धसतकीय पारी खेले। ओपनिङमा आएका अर्को खेलाडी तामिम इक्वालले ४० रन बनाए। भैरहवाका लागि ओपनरद्वयरले १०६ रनको साझेदारी गरे।

तेस्रो नम्बरमा ब्याटिङमा आएका उपुल थरंगाले ३९ रन बनाए। चितवनका करिम जन्नतले दुई साथै सागर ढकाल र सेकुगे प्रसन्नले समान १–१ विकेट लिए।

पहिलो पारीमा चितवनका लागि मोहम्मद साहजादले ३२, जन्नतले ३५ र प्रसन्नले २४ रन बनाए। त्यस्तै, भीम सार्कीले १६, राजेश पुलामीले १४ र दिलीप नाथले १३ रन जोडे।

भैरहवाका अभिनास बोहराले ३ विकेट लिए भने कुशल मल्लले दुई विकेट गिराए। धम्मिका प्रसाद, दुर्गेश गुप्ता र कृष्ण कार्कीले समान १–१ विकेट गिराए।