ला लिगामा रियल मड्रिडको पहिलो हार

काठमाडौं– स्पेनिस शीर्ष डिभिजनको फुटबल ला लिगाअन्तर्गत २०२१–२१ को सिजनमा रियल मड्रिडले पहिलो हार बेहोरेको छ। एस्पानोयलको मैदानमा शनिबार राति सम्पन्न खेलमा रियलले घरेलु टिमसँग पहिलो हार बेहोरेको हो।

खेलको १७औं मिनेटमै राउल डि टोमासले गोल गर्दै एस्पानोयललाई अग्रता दिलाएका थिए। यससँगै पहिलो हाफमा रियलल १–० गोलले पछि पर्‍यो। दोस्रो हाफको ६०औं मिनेटमा एलेक्स भिडालले गोल गरेपछि भने रियल २–० गोलले पछि परिसकेको थियो।

खेलको ७१औं मिनेटमा रियलका फरवार्ड करिम बेञ्जेमाले एक गोल फर्काएपछि खेलको नतिजा २–१ गोलअन्तरमा एस्पानोयलको पक्षमा रह्यो।

खेलको ६६ प्रतिशत समयमा बलमा नियन्त्रण बनाए पनि रियलले थप गोल गर्न भने सकेन। यससँगै शीर्षस्थानको रियल मड्रिडले अंकदुरी बढाउने अवसर गुमाएको छ।

उसको अहिले १७ अंक छ। दोस्रो र तेस्रो स्थानमा रहेका एट्लेटिको मड्रिड र रियल सोसिडाडको पनि समान १७–१७ अंक छ। विजेता एस्पानोयल भने ९ अंकका साथ १३औं स्थानमा छ।