देउवाले बोलाए सर्वदलीय बैठक, के ओली उपस्थित होलान्?

काठमाडौं- संघीय संसद्‍मा जारी अवरोध अन्त्यका बारेमा छलफल गर्न प्रधानमन्त्री शेरबहादुर देउवाले सर्वदलीय बैठक बोलाएका छन्। प्रमुख प्रतिपक्षी दल नेकपा एमालेले लगातार संसद् अवरुद्ध गरेपछि सहमति खोज्न प्रधानमन्त्री देउवाले आज बिहान १० बजे संसद्‍मा भएका सबै दलको बैठक बोलाएका हुन्। 

बैठकमा नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) नेपाल, लोकतान्त्रिक समाजवादी पार्टी, राष्ट्रिय जनमोर्चा, नेपाल मजदुर किसान पार्टी र राष्ट्रिय प्रजातन्त्र पार्टी राप्रपालाई बोलाइको प्रधानमन्त्रीको निजी सचिवालयले जनाएको छ। 

यसअघि संसद्‍को अवरोध रोक्न सभामुखले बोलाएको सर्वदलीय बैठक प्रमुख प्रतिपक्षी दल एमालेले बहिष्कार गरेको थियो। एमालेको अवरोधकै बीच सरकारले बजेट पास गरेको थियो। 

आफूले कारबाही गरेका माधव नेपालसहितका १४ सांसदलाई पदमुक्त नगरेर सभामुखले दल विभाजनमा सहयोगी भूमिका खेलेको भन्दै एमालेले संसद्‍को चालु अधिवेशनमा अवरोध गर्दै आएको छ। यस विषयमा सर्वोच्च अदालतमा समेत मुद्दा परेको छ।