इंग्ल्याण्डको गोलको वर्षा, पानामा ६–१ गोल अन्तरले पराजित

काठमाडौं-इंग्ल्याण्डले पानामालाई ६–१ को फराकिलो गोल अन्तरले पराजित गरेको छ । आइतबारको खेलमा लगातार दबाबमा रहेको पानामाले उत्तरार्धमा एक गोल गर्दै गोल अन्तर ६–१ बनायो । 
पानामा विरुद्ध इंग्ल्याण्डले पहिलो हाफ सकिँदा पाँच गोल गरेको थियो । खेलको आठौ मिनेटमा पहिलो गोल गरेका जे स्टोन्सको अग्रतालाई दोब्बर बनाउँदै टोलीका कप्तान केनले पेनाल्टी मार्फत गोल अन्तरलाई दोब्बर बनाएका थिए । 

त्यसपछि खेलको ३६ औ मिनेटमा लिंगाडले तेस्रो गोल गरेका थिए । खेलको ३९ औ मिनेटमा फेरि स्टोन्सले दोस्रो गोल गर्दै दुई टीमबीचको अन्तर चार शुन्य बनाएको थियो । 

त्यसपछि पाएको पेनाल्टीमा फेरि कप्तान केनले पाँचौ गोल गरे । दोस्रो हाफको खेल शुरु भएपनि पनि केनले अर्को गोल गरेर इंग्ल्याण्डको खातामा ६ गोल दर्ता गराए । 

खेलको ८४ औ मिनेटमा पानामाका फिलिप बालोए पहिलो गोल फर्काएका थिए । आजको खेलमा केनले ह्याट्रिक गरे । जारी विश्वकपमा केनको ह्याट्रिक दोस्रो  हो । यस अघि पोर्चुगलका किस्टियानो रोनाल्डोले ह्याट्रिक गरेका थिए । 

आइतबारको खेलपछि प्रतियोगितामा सर्वाधिक गोलकर्ता पनि केन बनेका छन् । उनले अहिलेसम्म पाँच गोल गरेका छन् । त्यसपछि पोर्चुगलका रोनाल्डोले चार तथा बेल्जियममा रोमेरो लुकाकोले पनि चार गोल गरेका छन् ।